Ал екінші тарап бау-бақшамызға жете алмай қалдық деп қиғылық салуда. Саяжай иелерінің тартысын тілшіміз көріп келді.

Саяжайларды қалада үйі жоқтар қысы-жазы қоныстанатын тұрақты баспанаға айналдырып алған. Көшеден күнде көлік нөпірі үзілмейді екен. Ашуланған кей тұрғындар жолдың екі бетіне бетон блок қойып, қозғалысты тоқтатып тастаған. Соның салдарынан арғы беттегі саяжай тұрғындары үйіне жете алмай зар илеп жүр.

Анатолий Салонский, саяжай тұрғыны:

- Бұл барып тұрған басып алу ғой. Ең кең көше, бәрімізге ортақ. Саяжайшыларды әбігерге салып қойды, тіпті жағдай ушығып барады. Жұрт төбелесуге дайын. 40 жылда болмаған мәселе. Қазір жабылып ашып тастадық, құлыптап қойған. Егер өрт болса, мынадай ыстықта бәрі кетеді ғой. Соны түсіндіре алмай жүрміз.

Түсінгісі келмей жолды жауып жүрген – 10 шақты адам.Олар қалтасынан қаржы шығарып шлагбауым орнатып қойыпты. Енді  өзара келісе алмай қалған бау-бақша бірлестіктері жолды жапқандардың жарығын өшірем деп өшігіп отыр. Ал көшені ашқысы келмегендер саяжайда басқа да жол бар екенін айтады.

Айгүл Ғабдуллина, саяжай тұрғыны:

- Міне, тас жолдан тура қажетті саяжайларына апаратын жол бар. Соны жөндеу керек. Сонда әркім өз жолымен жүреді.Ешкім ешкімге кедергі жасамайды.  Масқара емес пе, күніне 200 дей көлік жүріп өткенде, шаң жұтып отырғанымыз. Осы жолға жабысып қалғандай.

Көлік нөпірінен шаршаған жұрт тым болмаса, жылдамдықты тежейтін  кедергілер қойылса екен дейді. Бірақ оны саяжайшылар өз қаржысына

жасауы керек. Ал атқамінерлер көшені иемденіп алған тұрғындардың әрекеті заңсыз дейді.

Асхат Вазиров, Көкшетау қаласы жер қатынастары бөлімі басшысының міндетін атқарушы:

- Бұл жолдар мен өткелдер ортақ пайдаланымдағы жер. Мемлекет меншігі, бірақ ешкімнің балансында жоқ. Саяжай кооперативтеріне бөлінгендіктен, олар өздері келісіп шешуі қажет. Шлагбаум қойып, бетонмен бекітуге көпшіліктің келісімінсіз ешкімнің құқығы жоқ.

Күлтөбенің басына күнде жиналатын бақша иелері екіге жарылып қызыл кеңірдек болып жүргенде, саяжайдағы  жолдан басқа да өзекті проблема бар екенін естен шығарған сияқты. Олар тау төбе болып үйілген қоқыстың астында жатыр десе болады. Мынадай аптап ыстықта қоқыстан шыққан сасық иіс қолқаны жарады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!