Сөйтіп істің жабылғаны туралы зардап шегушілерге пошта арқылы хабарлапты.

Жол апатынан 58 жастағы әйелдің балтыры 16 жерден сынып, ал 10 жасар қыздың бір аяғымен бірге жыныс мүшесі де жұлынып кеткен. Қаулымен келіспеген баланың анасы жүргізушіні ғана емес, енді істі жылы жапқан полицейлерді де жазалауды сұрайды. Тілшіміз әділдік іздеп шырылдаған отбасымен сұхбаттасып қайтты.     

Светлана Сумелидидің бес айдан бері ішкені – ірің, жегені – желім. Жол апатының кесірінен әйелдің анасы мен қызы бір күнде мүгедек боп қалды. «КамАЗ» соққысынан 58 жастағы зейнеткердің жамбасы қақ бөлініп, сол аяғы 16 жерден сынған. Енді оның денесін өмірінің соңына дейін сүйегіне екі жерден жалғанған арматура ұстап тұрады. Ал 10 жасар қыздың жарақаты туралы айтуға ауыз бармайды. «КамАЗ» оның оң аяғын жұлып әкетті. Дәрігерлер дене мүшесін сол мезетте тігіп беріпті. Бірақ егер оқушы бір айда аяғынан басып жүрмейтін болса, одан да айырылғалы тұр. Бірақ бұл қасіреттің бер жағы ғана.     

Светлана Сумелиди, жәбірленуші қыздың анасы:

- Жыныс мүшесіне ота жасатуға дайындалып жатырмыз. Дәрігерді әрең таптық. Себебі: ота күрделі деп бәрі бас тартты. Жалғыз бір хирург қана келісімін берді. Ота сәтті жасалған күннің өзінде қызымның болашақта ана атануы екіталай дейді дәрігер. Ешқандай кепіл жоқ деді.

Баланы жаншып өткен жүк көлігі жыныс мүшесін жұлып әкеткен. Соның салдарынан ішіне жалғанған түтікше арқылы кіші дәрет сындырады.

Сұмдық жағдай 15-наурызда болған. Аялдаманың жанында автобус күтіп тұрған әжесі мен немересін «КамАЗ» жаншып барып бір-ақ тоқтаған. Оқушыны аман алып қалу үшін дәрігерлер әрқайсысы алты сағаттық алты ота жасаған. Бала он күн бойы ес-түссіз жатып, ал өз-өзіне келгенде есінен тана жаздаған. Тірілтіп алу үшін 84 мәрте наркоз салынды дейді анасы. Бірақ солай бола тұра, жүргізуші қамауға алынбаған. Тіпті бес айдан соң кінәсіз деп танылып,  іс жылы жабылған.  

Вера Макарушка, адвокат:

- Тергеушілер қылмыстық істі тоқтатты. Сорақысы сол, олар басынан бастап жүргізушіні күдікті ретінде іске тіркеген жоқ. Іспен танысқанда басқа көлік жүргізушілерінің сұралмағанын көрдім. Қажетті сараптамалар тағайындалмаған. Оқиға орнында ешкімнен сұрақ-жауап алынбаған. Бір сөзбен айтқанда, жүргізушінің кінәсін дәлелдейтін еш әрекет жасалмаған.

Керісінше, зардап шегушілердің өзі кінәлі боп шықты. Тергеушілер қаулыда өздері көлік астына түсті деп қорытындылапты. Онысын екі куәгер растаған. Адвокат оқиғаны «көзбен көрдім» дегендердің бірі күдіктінің көршісі деп отыр. Бір қызығы полициядағылар екі сөйлеп отыр. Іс тоқтады деп қаулы шығарғандар аяқасты тергеу қайта жалғасуда деп мәлімдеме жасады.

Евгений Лысенко, Алматы қаласы ПД ресми өкілі:

- Аталған факт бойынша сотқа дейінгі тергеу жалғасуда. Қосымша сараптамалар тағайындалады.

Сумелидилер отбасы істі бір жауып, бір ашқан полицияға сенім артып отырған жоқ. 10 жасар қыздың өміріне балта шапқан «КамАЗ» жүргізушісін жауапқа тартпай қоймаймыз деп отыр.

- Президентке дейін барамын! Бәрібір айтамын! Жүргізуші жазалансын! Жазалануға тиіс!

Бізді Youtubе-та қараңыз! Бізді Facebook-та, Instagram-да, Telegram-да оқыңыз!