Ол – Алматы облысының тұрғыны Жәния Азаматқызы. Жұлдызы жанған сәбиді бүгін шенеуніктер құттықтап барады деп, ауылдарындағы жолды  бір түнде жөндеп қойыпты. Шаттыққа толған отбасында тілшіміз де болып қайтты. 

Бүгін таңертеңнен Алматы облысындағы Дружба саяжайына кіреберіс жолдағы шұңқырлар жамалып, жан-жақ қоқыстан тазартылды. Мұнда қаптаған тілшілерден бөлек, облыс әкімдігінен шенеуніктер келетіні белгілі. Себеп – кішкентай Жәния Азаматқызы. Ол кеше еліміздің 19 миллионыншы тұрғыны болып тіркелді. Қуанышты хабарды бірінші болып Президенттің өзі жеткізді.  

Қасым-Жомарт Тоқаев, Қазақстан Республикасының Президенті:

- Тәуелсіздіктің 30 жылдығы қарсаңында Қазақстан халқының саны тарихи межеге жетті. Алматы облысында дүниеге келген Жәния Азаматқызы еліміздің он тоғыз миллионыншы азаматы ретінде тіркелді. Ата-анасы мен қазақстандықтарды осы қуанышпен құттықтаймын! Бауы берік болсын!

Осыдан кейін Нұрғалиевтерді толассыз құттықтап жатыр. Өздері бұған сенер-сенбесін білмейді. Халық санын 19 миллионға толтырған Жәния 20-маусымда дүниеге келіпті. Ал санаулы күн бұрын оны жақындары қырқынан шығарған.

Назгүл Көбентаева, Жәнияның анасы:

- Алматы қаласындағы №3 перзентханада түнгі сағат екі жарымда дүниеге әкелдім. Салмағы 4 келі 160 грамм, бойы 57 сантиметр. Уақытында жетіліп туылды.

Жәния отбасындағы үшінші қыз. Оны ата-анасы 7 жарым жыл бойы күткен. Қарапайым отбасының Дружба саяжайында тұрып жатқанына 10 жылдай болыпты. Отағасы құрылысшы, жары қаржыгер. Назгүл қазір декрет  демалысында. Жығылғанға жұдырық болып, отағасы  денсаулығына байланысты жұмысқа жарамсыз болып қалыпты.

Азамат Нұрғалиев, Жәнияның әкесі:

- Тірі адам тіршілігін істейді. Тіршілік істейміз. Арасында шығып аздап такси айдаймыз. Өзімнің денсаулығым ауыр жұмысқа сәл жарамай қалды. Бұрын ауыр жұмыс істей беретінмін.

19 миллионыншы тұрғынды анықтау үшін Ұлттық статистика бюросына  бір  жарым айдай уақыт қажет болған. Санақ республика бойынша жүргізіліп, әр секунд ескеріліпті.

Әсем Алданғарқызы, Ұлттық статистика бюросының баспасөз хатшысы:

- 19 миллионыншы тұрғынды анықтауда барлық демография ескерілді. Соның ішінде тірі туғандар мен қайтыс болғандардың саны, елімізге тұрақты тұруға келгендер мен кеткендер саны ескеріліп анықталды. Жалпы осы 19 миллионды дәл уақыты бойынша анықтадық. Әр сағат, минут, секунд ескерілді.

Халық санын 18 миллионға толтырған тұрғын да төрт жыл бұрын Алматы облысында дүниеге келген. Сол кезде Амандық Баталовтың өзі Мүслима Саматқызының отбасына үш бөлмелі пәтер сыйлаған. Бүгін Жәнияның ата-анасын облыс әкімінің орынбасары Арслан Дандыбаев құттықтап келді. Бұл жолы шенеуніктер 1 миллион теңге мен нәрестеге қажет құрал-жабдық сыйлаумен шектелді. Себебі:

- Бұл жолы  пандемия бәрімізге кішкене өзгеріс енгізіп отыр. Көреміз.

Ал шалғайда тұрып жатқан отбасының арманы – қалаға қоныс аудару.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!