Тағы 88 адам жапа шеккен. Оның 28-і қазір ауруханада. Ал әскери бөлімдегі өрт қасақана қойылуы мүмкін. Мұны қорғаныс министрі жоққа шығармайды. Нақты себебін арнайы комиссия анықтап жатыр. Жарылысқа қатысты соңғы ақпарат:

Тараз қалалық ауруханасы. Қазір мұндағы жағдай кешегідей емес, дүрбелең басылған.

Кеше әскери бөлімде болған жаралыстан 4 адамның қаза тапқаны белгілі болды. Олар – әскери қызметкерлер. Бақилық болғандардың біреуі әскери прокурор, екеуі сержант пен ефрейтор және төртіншісі әскери күзет қызметкері. Тағы үш әскери қызметкер із-түзсіз жоғалғандар санатында. Бұл туралы жаңа ғана өткен баспасөз жиынында қорғаныс министірінің өзі мәлім етті. 

Нұрлан Ермекбаев, ҚР Қорғаныс министрі:

- Өкініштісі, төрт әскери қызметші зардаптарын жою кезінде қаза тапты. Ол  полковник Хапезов, оңтүстік өңірдің әскери прокуроры, Мешінбаев әскери бөлімінің келісімшарты бойынша сержант, келісім бойынша ефрейтор Жанболатов және әскерилендірілген гвардияның қызметкері Дәлібаев. Осы мүмкіндікті пайдаланып, барлық әріптестерімнің атынан көңіл айтамын.

Дәл қазір бегілі болғаны, бірнеше төтенше жағдай қызметкерлері із-түзсіз кетіпті. Олар әскери бөлімде болған өртті ауыздықтауға қатысқандар. Сол қарбалас кезінде олармен байланыс үзілсе керек. Әзірге жоғалғандардың нақты саны және аты-жөндері айтылмады. Белгілісі, іздеу жұмысы жүргізілуде. Бұл туралы төтенше жағдайлар министрі Юрий Ильин мәлімдеді.

Юрий Ильин, ҚР Төтенше жағдайлар министрі:

- Өрт сөндіруге қатысқан бірнеше қызметкермен байланыс үзілді. Оларды іздеу шаралары жалғасып жатыр.

Жарылыстардан 88 адам жараланған. Көбінің жарақаты жеңіл. Ал 28-і қазір ауруханада жатыр. Алтауының жағдайы ауыр дейді дәрігерлер. Өрттің шығу себебін арнайы құрылған тергеу тобы анықтауға тырысып жатыр. Тілсіз жаудың неден тұтанғаны әзірге белгісіз. Қорғаныс министрлігі бірнеше нұсқаны қарастыруда. Тіпті өрт қаса-қана қойылуы мүмкін деген болжам да бар. Соңынан қоса кетейін, әскери бөлімдегі жарылыс кезінде 10 мәрте жойқын дүмпу болған.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!