Алматының тау бөктерінде 25 гектар жер күлге айналды
Алматының тау бөктерінде тұтанған өрт 25 гектар жерді күлге айналдырды. Қураған шөптен басталған жалынды бірден өшіру қиын болған. Дегенмен сол маңдағы жер үйлерге жетпей ауыздықталды.
Автор: Асқарбек Қазанғап
06.09.2021
Өрттің неден тұтанғанына қатысты ресми қорытынды жоқ. Бірақ бірнеше болжам айтылды.
Түтіні будақтап басталған жалын ілезде күш алып бет қаратпайтындай өршіген. Төтеншеліктер түскі төртте тау бөктеріне жөнелтілді. Абыр-сабырда бірі резеңке күрекпен, екіншісі пластмасса ыдыстағы сумен отты өшіріп әлек. Соңғы уақытта жиілеген өрттің себебін сол маңдағы тұрғындар малшылардан көріп отыр.
Елена Куприенко, Думан ықшамауданының тұрғыны:
- Әр жексенбі сайын біздің тау өртенеді. Біздің ойымызша, шопандар осындай қастандыққа барып отыр. Олар осы жерде қой бағады. Барлық шөп жанып кетті. Бір ай бұрын қарсы беттегі қырат өртенген, қазір шөп шығып, сол жақта малдар жайылып жүр.
Өрт өшкеннен кейінгі көрініс. Бұл жол болмаған кезде 5-10 метр жердегі үйлерге де ауыз салуы мүмкін еді. Ал бір бетте енді бой көтеріп жатқан баспананың құрылыс материалына дейін түгі қалмай жанып кеткен.
Өрт кешкі сағат тоғыз шамасында бір-ақ ауыздықталды. 25 гектар жерді күлге айналдырып үлгерген. Тау бөктері болғандықтан от ошағына жету мен өшіру қиын болды дейді төтеншеліктер.
Ерлан Ахашов, Алматы облысы ТЖД бастығының орынбасары:
- Өрт сөндіруге Алматы облысы ТЖД мен Алматы қаласының ТЖД, 28-200 әскери бөлімі, Іле Алатау мемлекеттік ұлттық табиғи паркінің және жергілікті атқарушы органдардың барлығы 132 адам мен 22 бірлік техника жұмылдырылды.
Өрттен зардап шеккендер жоқ. Оттың неден тұтанғаны әзірге белгісіз. Мамандар тексеруді бастап кетті.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
