Сөздеріне сенсек, билік өкілдері биыл елдімекенге газ тартылады деп сендіріп, енді сөзінен тайқып кеткен. Ашулы бұқара уәде орындалмаса, көресіні көрсетеміз деп наразы.

Бес баланың анасы Зағира Кәрібаева әкімдікке алдандым дейді. Оның сөзінше, шенеуніктер осы жылы ауылға газ тартылады деп айтқан екен. Соған имандай сенген 40 жастағы әйел 330 мың теңгесін төлеп, көшеден үйге дейін газ құбырын жүргізіп алған. Бірақ әлі күнге дейін көгілдір отын қосылмаған. Бар ақшасын жаратып қойған көпбалалы ананың көмір алуға да шамасы жоқ. Енді өзі амалсыз, әдеттегідей, ағашпен үйін жылытуға мәжбүр. 

Зағира Кәрібаева, Ақшолақ ауылының тұрғыны:

- Газ кіреді деп сеніп қалып, көмір алмадық. Өзім жас босанып отырмын. Үй тастай суық. Плиткаларды тоққа сұғып отырмыз. Ағаш та жағып отырмыз.

Ақшолақ ауылында жалпы саны 150 түтін бар.  117 үйге газ құбырын кіргізіп алған. Тіпті кейбірі көгілдір отын болады деген үмітпен ағаш және көмірмен жанатын пешті шығарып тастап, газбен жанатын қазандық орнатып алған.  Ауыл қазір газсыз. Тұрғындар қыстың күні баспанасын немен жылытарын білмей дал.  

Мырзахан Сапарбаев, Ақшолақ ауылының тұрғыны:

- Газ да жоқ, екеуі де жоқ. не істерімді білмеймін, 10-желтоқсанға шейін кіргізіп береміз деп айтқан. Кірсе кіргізіп берді, болмаса ауылдың бәрі жолды жауып, пойызды тоқтатамыз. Басқа амал қалған жоқ.

«Пойыз бен көлік қозғалысын тежейміз» деп сес көрсеткен ауыл халқының 90 пайызы мердігермен келісіп ақысын төлеп, ішкі желіні жүргізіп алған. Бірақ сонда да мәселе шешілмей тұр. Бұқара тиісті орынның бәріне арыз жазыпты. Алайда әзірге еш нәтиже жоқ. 

Қайрат Мәдиев, Ақшолақ ауылының тұрғыны:

- 2020 жылы кіріп қалуы мүмкін еді, одан кейін 2021 жылдың аяғына дейін түгел аяқтаймыз дейді. Енді келіп ақша бөлінбейтін болды дейді. Халық сеніп отыр ғой.

Белгілі болғаны, ауылдан үш жарым шақырымдай жерге магистарльды газ құбыры келіп тұр екен. Содан елдімекенге қарай құбыр тарту құны 450 млн. теңгеден асып кеткен. Бұл сомамен үш бірдей ауылдың шаруасы шешілмек. Алайда әкімдік қолымызда ондай ақша жоқ дейді. Сондықтан республикалық бюджетке алақан жаюға  мәжбүр.  

Жанәділ Әйтбеков, Жамбыл облысы энергетика және ТКШ басқармасы басшысының орынбасары:

- Республикалық бюджеттен қаржының бөлінбеуіне байланысты құрылыс жұмысы тоқтап, толық Ақшолақ ауылына газ құбырын кіргізуге мүмкіндік болмады. Біз тағы 400 млн. теңгеге бюджетке өтінім дайындадық. Осы жылы сол ақшаны бөліп алсақ, онда Ақшолаққа газ құбырын толық әкеп береміз.

Тұрғындар шенеуніктердің газ тартуға қажет ақшаны ертерек іздемегеніне ашулы. Ал атқамінерлер көпті сабырға шақырып, биыл қаражат бөлінеді дегенге сендіргісі келді. Тіпті жыл соңына дейін газ қосылады деп тағы да уәде берді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!