Президент лауазымына қайта сайланған әріптесін мемлекеттік сапармен елге келуге шақырған Тоқаев өзбек көшбасшысының жеңісін жалпы халықтың қолдауы деп бағалады. 

Жексенбіде Өзбекстанда президент сайлауы өтті. Онда елдегі сайлаушылардың 80 пайызы дауыс беруге қатысыпты. Демек сайлауға келуі тиіс 19 миллион адамның 16 миллионы өз таңдауын жасаған. Ал дүбірлі саяси додада Шавкат Мирзиеевпен бірге тағы 4 үміткер бақ сынаған.

Алайда оппозициялық  үш партияның сайлауға қатысуына рұқсат берілмегені айтылып қалды. Алғашында Мирзиеевтің 90 пайыз дауыспен өзгелерден қара үзіп шыққаны жөнінде ақпарат тараған еді. Кейін оның 80 пайызбен жеңіске жеткені хабарланды. Басқа үміткерлердің еншісінде 3-6 пайыз аралығында дауыс бар.

Өзбекстандағы Президент сайлауы бес жыл сайын өткізіледі. 2016 жылы елді 27 жыл бойы  басқарған Ислам Каримов өмірден өткен соң кезектен тыс сайлауда Мирзиеевтің бағы жанған болатын. Енді Өзбекстанның қазіргі көшбасшысы Президент тағына екінші рет жайғасады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!