Полицейлер де жөнін айтпаған. Сөйтсе автокөліктер қылмыстық іс бойынша заттай дәлел ретінде танылған. Мемлекеттік тіркеу бар, барлық құжаты түгел көліктердің енді қашан иесіне қайтарылатыны белгісіз. Жаяу жүргіншінің күнін кешкен азаматтардың арызын КТК тілшісі тыңдап қайтты.

Шетелдік көліктің рахатын Нұрсұлтан Мұса тек екі ай ғана көрді. Қазір қаратүсті темір тұлпары айыппұл тұрағында қардың астында көміліп тұр. Ол жақта не себепті тұрғанын көлік иесі толық білмейді. Тіпті көлікті  жұмысынан келіп полиция алып кеткенде аң-таң болыпты. Басында мың сұрақ.

Нұрсұлтан Мұса:

- Жұмыста отырсам, кешқұрым маған бір жігіт хабарласты. Өзін полицияның жедел уәкілімін деп таныстырды. Өз формасында емес, кәдімгі қарапайым киімде болды. Көлігім іздеуде екенін, бір қылмыстық іске заттай дәлел ретінде танылғанын, соған байланысты алып кететінін айтты. Бірақ көлікті алу туралы заңды құжатты көрсеткен жоқ. Эвакуатор шақырды да, санаулы уақыттың ішінде алып кетті.

Нұрсұлтан сияқты түсініксіз жағдайға түскен жүргізушілер елімізде аз емес. Бәрі де көлігін танымал сайттан сатып алған. Халыққа қызмет көрсету орталықтарында тіркеуден өткізіп, мемлекеттік нөмір алған. Ешқандай айыппұл, салық сол сәтте болмапты. Кейін машиналарының NurAuto.kz компаниясына қатысты қылмыстық іске қатысы барын біліп шошыған. Бірден іске кірісіп әлеуметтік желіде чат құрып, жәбірленушілер бір-бірін тауып алған.

Марат Айтқожин:

- Барлық іс бойынша мен куәгермін. Бізді жәбірленуші тарап етінде таныса деймін. Адал сатып алушымын, ескі көлігімді сатып, оған жиған-терген ақшамды қосып жаңалау көлік мінейін деген ниетпен сатып алып едім. Бір апта ғана айдадым. Менің қорқатыным, Nur avto компаниясына қатысты іс біткенде көлігімді алып кететін сыңайлы. Өйткені компания зардап шегушілерге залалды қайтару керек қой. Nur avto-ға менің қатысым жоқ, ол туралы мүлдем естімеппін.

Көлігін қайтаруды талап еткен жүргізушілердің арызын Нұр-Сұлтандағы полиция мен прокуратура пысқырмапты. Ал сарапшы мамандар олардың қайта арыздануына құқығы бар дейді. Өйткені көліктердің соңғы иесі оны заңды түрде мемлекеттік тіркеуден өткізіп сатып алған. Заң бойынша меншіктегі затты ешкімнің тартып алуға құқығы жоқ.

Назар Абинов, заңгер:

- Егер олар тергеушінің іс-әрекетімен келіспесе, бұл шешіммен сотқа немесе прокурорға шағымдануға болады. Менің ойымша тергеушінің көлікті тартып, айыппұл тұрағына қоюы дұрыс емес. Көліктің жаңа иесіне машинаны сатпау туралы, ешқайда кетпеу туралы, сотқа шақырылған кезде қатысу туралы қолхат жаздырып алу керек еді. Сол кезде көлік жүргізушісінің де, құқыққорғаушылардың да құлағы тыныш болары сөзсіз. Қазір бостан-бос айыппұл тұрағын толтырып тұр.

NurAuto.kz компаниясына қатысты дау биыл қазан айында басталған. Блогерлер жарнамасымен шақырылған халыққа мұнда өте қонымды шарттармен, арзан бағада көліктер сатылды. Клиенттердің сеніміне кірген компания кейін сатып алушыға қайта хабарласып, ақша қосса бөтен қымбаттырақ көлік алуға болатынын айтады. Темір тұлпарларын күтіп шаршаған клиенттер алданғанын біледі. Қазір компанияға қатысты «Алаяқтық», «Бірлескен қылмыстық ұйым құрғаны үшін» қылмыстық іс қозғалған.

Компанияға қатысты тергеу жүргізіліп жатқан соң, полиция да, прокуратура да ләм-мим дей алмай отыр. Тіпті жазықсыз көлік жүргізушілеріне әрі қарай не істеуге болатыны жөнінде жөн сілтеген жоқ. Заңгерлер мұндай жағдайға кезікпес үшін көлік сатып алар кезде міндетті түрде көліктің тарихын, оны кім және қалай сатып алғанын тексеруі керек дейді. Сатып алу-сату туралы келісімшартты оқуға да міндетті.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!