Алайда полиция ғимаратынан 31 жастағы азамат тірі шықпады. Қостанайдан дереу жеткен әкесі мәйітханада жатқан ұлымның денесінің сау-тамтығы қалмаған дейді. Ал полиция департаменті таратқан ақпаратта қалыңдық туралы сөз жоқ. Шымкентке көлік ұрлауға келді деген күдіктінің денсаулығы дімкәс болуы мүмкін деп отыр тәртіп сақшылары.

Нұрболат Жұмабаев досымен бірге Қостанайдан Шымкентке бес күн бұрын келіпті. Қалыңдығын үйіне апару үшін келген жігіті жанындағы досымен дәмханада отырған жерінен арнайы жасақ қолын қайырып әкеткен. «Көлікке отырғызғаннан бастап басымызға қапшық кигізіп ұра бастады», - дейді Сергей Петров. «Департаментке жеткізгенде тепкі үдей түсті», - деп отыр денесі мен басынан жарақат алған марқұмның досы.

Сергей Петров, жәбірленуші:

- Мен досымды соңғы мәрте көргенде полицейлер ұрып жатқан. Одан соң екеуімізді бөлек әкетті. Менің қолымды кісендеп, жерге жатқызып басымнан тепті. Бір мәрте басыма кигізген қапшықты шешіп, түрін жаттап үлгердім. Олар 3-4 жедел уәкіл мен тағы арнайы жасақтың жігіттері. «Сендер көлік ұрладыңдар, сондықтан мойындаңдар, көрші кабинеттегі досың мойындауға шақ қалды» деп күштеді. «Өз еркіңмен қол қоймасаң, денсаулығыңнан айрыласың» - деп қорқытты.

Бірақ жедел уәкілдермен кіргізілген Нұрболат Жұмабаев кабинеттен тірі шыққан жоқ. Тергеу кезінде жағдайы күрт нашарлаған 31 жастағы жігіт жедел жәрдем келгенше көз жұмған. Қостанайдан жедел келген әкесі бүгін мәйітханада ұлының мүрдесін көріп шошып отыр. Айтуынша, шаңғы спорты, бокспен айналысқан ұлының денесінің сау-тамтығы қалмаған.

Ерқара Жұмабаев, марқұмның әкесі:

- Маңдайы, құлағы, ернінің іші жыртылған. Асты да, үсті де, мойны қарайып кеткен. Аяғының ортасы, шаты, сосын қолын кәдімгі темірмен ұрған секілді, қанталаған емес, терісі жыртылған. Аяғының да.

- Полицейлер ұрған деп санайсыз ба?

- Енді оны басқа адам ұрмайды, сап-сау бала ғой. Сағат 12-де ұстаған. Сағат 4-5-ке дейін ұстаған. Соның ішінен өліп шыққан ғой.

Марқұм Нұрболат Жұмабаевтың адвокаты да полицейлер өрескел заңбұзушылыққа барғанын айтады.

Талғат Есімов, адвокат:

- Үш сағаттан астам заңсыз ұстапты. Неге бұл уақытта адвокат бермеген? Одан соң жедел уәкілдер неге тергеушіге дейін жеткізбеген? Тергеу мен заңды шешім қабылдау тергеушінің құзырында емес пе? Қылмыс жасаған күннің өзінде неге арнайы жасақпен ұстайды? Бұлар қылмыстық топтың мүшесі емес қой. Неге заң бойынша шақырту қағазын жібермеген?

Бұл сұрақтарға жауап беру үшін полиция департаменті бастығының өзі шықты. Генералдың сөзінше, адвокат шақыртылған екен. Ал Нұрболат Жұмабаевпен серігі Сергей Петров бірнеше көлік ұрлау дерегі бойынша күдікті ретінде өтіпті. Тіпті бұлтартпас дәлелдері де бар екен. Ал тергеу кабинетінде «камералар бар» деген ол мән-жай тек сараптама қорытындысынан кейін ашылады деп отыр.

Ералы Жұмаханбетов, Шымкент қаласы ПД бастығы:

- Дәлізде орнатылған, кабинетте бар. Кабинетте сөйлескен, сол жерде жігіттерге «мазам болмай жатыр» деген. Кешіріңіздер, біз дәрігер емеспіз. Әркімде әртүрлі жағдай болады. Енді сараптама шешімін күтейік.

Қазір бұл іспен қалалық прокуратура мен министрліктің өзіндік қауіпсіздігінен келген лауазымды шенділер айналысып жатыр. «Шымкенттің сот-сараптамасына сенбейміз» деген марқұмның жақындары тәуелсіз сараптаманың көмегіне жүгінбекші. Ал бір аптадан соң үйлену тойы болады деп күтіп жүрген Нұрболат Жұмабаевтың денесі бірер күнде туған қаласы Қостанайда жерленеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!