Бұл ретте, жеке дезинфекциямен айналысатындардың саудасы қызу. Зиянкестермен күрес және одан құтылудың жолы қандай?

- Осылай киініп алу керек, міндетті түрде. Болмаса, мен де өзіңнің үстіңе мінгізіп алып үйіме апаруға қорқамын. Өйткені адамдардың жыны ұстайды, мына қандала шаққан кезде.

Рахиманың бес жылдан бері қандала улау үшін бармаған күні жоқ. Айына жүз пәтер, күн сайын, жоқ дегенде екі-үш үйді дизенфекциялайды. Қандала шағып берекесі қашып, жүйкесі тозған астаналықтар тұмшаланған ақ киімді жандарды құтқарушы періштесіндей көреді.

- Міне, қандала. Адамды шағады да, диванның тігісіне тығылады. Мынау солардың жұмыртқа, қалдырған орындары. Мынаның ішінде жұмыртқа бар деген сөз.

Төсекке, киімге жұққан қансорғыштан құтылу өте қиын. Оны камералық дизенфекциялау керек немесе біржола көзін құрту керек. Кейде тұрғындар қандала бұрыш-бұрышына тығылған жаңа жиһазын сол күйі лақтыруға мәжбүр. Ебін тапқандар сатып та жібереді екен. «Паразиттен қашып пәтерден-пәтерге көшіп жүргендер өзінің тасымалдаушы екенін білмейді де», - дейді дезинфекторлар.

Рахима Дүйсенбиева, дезинфектор:

- Басты себеп, пәтер жалдап тұратындар ғой. Пәтерден пәтерге көшіп жүреді. Бізде, астанада, жалға алушылар көп. Солармен көшеді, бір жерден екінші жерге. Мысалы, қандаласы жоқ пәтерге өзімен қандала алып келеді. Сөйтіп подъезге жаяды.

Нұр-Сұлтандағы үйлерде қандаланың қаптап кетуінің нақты себебі жоқ. Қалада елуден аса кәсіби паразиттерден тазартатын дезинфекциялық ұйым бар. Жасырып қалуға, жалғыз, жалаң қолмен күресуге тағы болмайды.

Айбарша Дүйсенбайқызы, Нұр-Сұлтан қаласы санитария-эпидимиология департаментінің бас маманы: 

- Бір рет дезинфекциялық өңдеу жасаудан қандала кетпейді, үш ретке дейін жасау керек. Әр жасатқаннан кейін 7 немесе 10 күнде қайталап отыру керек. Көбі камералық өңдеуге бермейді, көрпе-жастықтарын, үйге толық дезинфекция жасатпайды, көршілеріне айтпайды. Ол өз үйіне ғана жасатады. Бір айға ғана кетеді, одан кейін қайта пайда болады.

Әбден зәрезап болған астаналықтар үй жалдап аларда жылу мен судан бұрын қандаланың бар-жоғын сұрайды екен. Онсыз да ай сайын пәтерақы төлейтін жұртқа апта сайын дезинфекция жасату қалтасын салмақ болары анық.

Сәуле Нұрпейісова, риелтор:

- Бәрі үйді сатып, не жалдап аларда «бұл үйде қандала жоқ па?» деп сұрайды. Біз нақты бар немесе жоқ деп сеніммен айта алмаймыз. Мүмкін бұл үйде осыған дейін ондай мәселе болған шығар. Оны дәлелдей алмаймыз. Қандаланы сатушы, риелтор, үй иесі тіпті кәсіби маман да көрмей қалуы мүмкін ғой. 

Елордаға қандала эпидемиясы КВИ-нан бұрын келген. Паразит суық пен ыстыққа төзімді, жойылуы қиын. Түпкілікті құтылудың амалы да жоқ. Сондықтан әр үйдің иесі шамасы мен жүйкесі жеткенше, шағатын жәндікпен өзі күресуі тиіс. Өйткені қаланың санэпидемиялық орталығы қандаладан баспананы тазалау жұмысын өз мойнына алмайды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!