Балқаш хоккейшілері көл бетіндегі қатқан мұзда жаттығып жүр
Балқаштағы хоккейшілердің жағдайы мүшкіл. Олар көл бетіне қатқан мұздың үстінде жаттығу өткізіп жүр. Өйткені қаладағы «Метталург» стадионын сенімгерлік басқаруға алған кәсіпкер мұз айдынын сырғанауға дайындамаған.
Автор: Саят Дәулетжанұлы
25.01.2022
«Бертіс» әуесқой хоккей клубының мүшелері қазір көлдің бетінде жаттығуларын жалғастыруда. Көк мұздың үстіндегі қарды өз күшімен тазалауды міндетіне алған. Айтуларынша, жылда жаттығатын орталық стадиондағы мұз кортына кіре алмаған. Стадионды биыл мемлекеттен сенімгерлікпен басқаруға жеке кәсіпкер алыпты. Бірақ стадиондағы мұз айдынын сырғанауға дайындамаған. Қысқы спорт түрімен айналысушылар жаттығатын жер таппай көлге шығып кеткенде ғана жергілікті шенеуніктер есін жиған. Олар олқылықтың орнын толтыруға «барымызды саламыз» деп отыр.
Дәлелбек Нұрбек, Балқаш қаласы спорт бөлімінің қызметкері:
- Мұз жамылғысының сапасы қанағаттанарлықсыз жағдайда. Осыған байланысты хоккей командасына жаттығуды сапалы өткізуге мүмкіндік жоқ. Баяндалғанды ескере отырып, сенімгерлікпен басқарушыға мұз жабындысын ретке келтіру және жаппай сырғанауға жағдай жасау, хоккей жаттығуларына жағдай жасау тапсырылды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
