Ахметжан Пірімқұлов пен Медет Құмарғалиев екі ай қамауда отырады
Экология вице-министрі Ахметжан Пірімқұлов пен атышулы «Оператор РОП» басшысы болған Медет Құмарғалиев тергеу аяқталғанша, яғни екі ай қамауда отырады. Бұл екеуі сыбайлас жемқорлыққа қатысы бар деген күдікке ілініп, 26-қаңтарда тұтқындалған болатын.
Автор: Әзиза Төленби
28.01.2022
2019 жылдың шілдесінен бері вице-министр қызметін атқарған Пірімқұлов дәл осы қалдықтарды өңдеу мәселесіне жауапты болды. Ал Құмарғалиев 2019 жылдың қарашасында «Оператор РОП» жеке компаниясының басқарма төрағасы боп келген.
Еске салайық, бұған дейін президент Қасым-Жомарт Тоқаев утилизациялық алым мөлшерінің шектен тыс көп екенін, әрі онымен жеке компанияның айналысуы қате деп, осы "Оператор РОП"-ты атаған. Серіктестікте тексеру басталған бетте атқарушы директорлардың бірі болған Руслан Шәмшиев асылып өлді. Іле-шала басқарма төрағасы Құмарғалиевтің қолына кісен салынды.
Тағы бір маңызды мәлімет: "Оператор РОП"-қа қатысты тергеу-тексеру басталғандықтан, оның орнын басқан «Жасыл Даму» акционерлік қоғамы утилизациялық алымды уақытша тоқтатты.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
