Шыдамы таусылғандар құрылыс компаниясының алдына барып мәселенің тезірек шешілуін талап етті. Ал үйді салған компания 10 қабаттан жоғары нысандарға газ құбыры тартылмайды деп отыр.

- Газ, газ, газ. - Менде кран жоқ. Газ қосыңдар. Мен барлығын жасадым...

Екі жылдан бері газсыз отырған тұрғындар үйді салған құрылыс компаниясының алдына келді. Олар тамақ пісіріп, шай қайнату үшін әр пәтерге көгілдір отын тартып беруді талап етуде. Айтуларынша үйді салып жатқанда құрылыс компаниясы құбыр жүргізіп, тұрғындар толық қоныстанған соң газ беріледі деп сендірген. Алайда берген уәдесін сол күйі орындамаған.

Болат Омаров, Ақтау қаласының тұрғыны:

- Біздің үйге газ құбырын қондырды. Кәдімгідей үйдің ішіне, пәтердің ішіне бәрі тұр. Басында 70-80 пайыз қоныстану керек деген. Қазір 100 пайыз қоныстанған. Бәріміз электрпешін қолданып отырмыз.

Зиба Елеусінова, Ақтау қаласының тұрғыны:

- Мекеме түк істемейді. Өз қатесін мойындамайды. Құжат та дұрыс емес. «Ақтау газ аймаққа» еш құжат уақытында тапсырылмаған. Осылардың қателігі. Енді өздерінің қатесін түзетуге еш әрекет жасамай отыр. Бізбен кездесуге де келмейді.

Газдың жоқтығынан тұрғындар электрпешін қолдануға мәжбүр. Алайда жарықтың бағасы қымбат дейді. Сондықтан газ берілсе, шығынымыз азаяр еді деп отыр. Ал құрылыс компаниясы пәтерлерге газ беруді сұрап жауапты компанияға хат жазыпты. Алайда 11 қабатты үйлерге газ жүргізілмеуі керек деген заң шығып, уәдені орындай алмадық деп отыр.

Бекболат Үсен, құрылыс компаниясының өкілі:

- Біз үй салып бітеміз дегенше үкімет заңы өзгеріп кетті. Шектеу қойды. 11 қабатты үйге газ берілмейтін болды. Бірақ жүргізіп қойдық. Мен заң шығармаймын. Газдың краны менде жоқ. Тағы да хат жаздық. Техжағдайы  бізге алыстағы қосылу тетігін жақындатып, үйдің қасындағы құбырдан беріңіз деген хатымыз бар. Жауабын әлі алған жоқпыз.

Ал «ҚазТрансГазАймақтағылар» 11 қабатты үйге заң бойынша газ жүргізе алмаймыз деп отыр.  Ашынған тұрғындар құзырлы органдардың есігін қақпақшы. Уәдені орындамаған компанияның үстінен арыз жазуға бекініп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!