Енді олар құрғық уәде, сырғытпа жауаппен құтылмай, жұмысты іс жүзінде атқаруы керек. Жарлықта сол кездесулердің форматы мен регламентіне дейін анық жазылған.

Президент Қасым-Жомарт Тоқаевтың 7-наурыздағы қаулысынан кейін «Әкім бол – халқыңа жақын бол» деген сөздің мағынасын атқамінерлер толық ұғынуға тиіс. Кабинеттерінің есігін тарс бекітіп, жағдайға тек терезеден қарап баға беретіндерге президент қаңтардың басында-ақ елмен етене араласыңдар деп айтқан. Өйткені әкім-қаралардың көбі халықпен жұмыс істеуді білмейді немесе қорқады. Жергілікті басшыларға сенімнің азайғанын 4 жылда бір рет өткізілетін бүкіләлемдік құндылықтар туралы әлеуметтік сауалнама да, Қазақстан қоғамдық даму институты жүргізетін тексеріс те растап отыр.

Жұлдызай Ысқақова, Қазақстан қоғамдық даму институтының сарапшысы:

- Біздегі халықтың президентке деген сенімі 70-80 пайыз болса, жергілікті атқарушы билік өкілдеріне 40 пайыз. Яғн, азаматтар қандай да бір мәселеге тап болса сол жерде оның шешілмейтінін түсінеді. Сондықтан тұп-тура арызын президентке жеткізгісі келеді. Ол үшін арнайы әлеуметтік көмекші де бар. Тек әкімдер ғана емес, жергілікті сот орындаушыларынва, құқық қорғау органдарына да деген елдің сенімі кеткен.

Расында желіге жарияланатын түрлі арыз-шағымдарды оқып отырсаңыз, ел президентінің парақшасын белгілеп кетеді. Осылайша ағайын талап-тілектерін тура мемлекет басшысының өзіне жеткігісі келеді. Әкімдер жылына бір өткізетін есеп беру кездесудің өзінде уақыттың 70 пайызын алдын ала дайындалған есебіне арнаса, қалған отызында ғана елдің арызын тыңдайды. Енді жиналыста есеп пен сұрақ-жауапқа уақыт теңдей бөлінуге тиіс. Мұның барлығы президент жарлығында анық көрсетілген.

Аян Сакошев, Қазақстан қоғамдық даму институтының зерттеушісі:

- Бұл жарлық бұрынғы форматтың өзгергенін көрсетеді. Бұл жерде арнайы адамдарын дайындап, сұрақтарын дайындап керек емес деп ойлаймын. Әрбір мемлекеттік органның басшысы ашық түрде халықпен, дайындықсыз дегендей, кездесіп, олардың нақты сұрағына жауап беруді өөдерінің жұмысының басты бағыты ретінде анықтауы қажет.

Президент жарлығына сәйкес, әкімдер қол астындағыларды жинап алып кабинетінде өткізетін маңызсыз жиналыстарын азайтуы керек. Мәселен, аудан әкімдері тоқсан сайын өзі басқарып отырған аудан аумағындағы барлық ауыл-аймақты аралап шығуға тиіс. Сондай-ақ әкім-қаралар қажет болған жағдайда техниканың мүмкіндігін пайдаланып бейнеконференция ұйымдастырып, елдің талап-тілегін онлайн естуге де міндетті. Ең бастысы – тыңдалған өтініштің барлығы бас шұлғыған бос уәде күйінде қалмай, орындалуы қажет.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!