Аудан әкімдігі осыдан бес жыл бұрын құрылысқа тендер жариялап, мердігермен де келісімшарт жасасыпты. Кейін ақшаның жоқтығынан ол келісімді тоқтатып қойған.

Темірбекет ауылындағы ғимарат 90 жылдай бұрын салынған. 1974 жылға дейін разъездегі вокзал қызметін атқарыпты. Қазір ескі ғимараттың аядай екі бөлмесінде бастауыш сыныптың 20 оқушысы оқып жатыр.

Қос бөлме айналдырған 20 баланың өзіне тар. Сондықтан мұндағы оқушылар екі аусыммен оқиды. Іргетасынан бастап қабырғасына дейін қақырап тұр. Ата-аналар балаларымыз бір күні үйінді астында қала ма деп қорқады. Осыдан екі апта бұрын сыныптағы пештен жалын сыртқа атқылап, мұғалімдер отты дер уақытында сөндірген.

Гүлмира Төлегенова, Теміркөпір ауылының тұрғыны:

- Бұл мектеп емес, негізі вокзал. Мектеп деп айта алмаймын. Мектептке жібергім келмейді, бірақ амалым жоқ, қай жаққа барып оқиды? Мектеп ыс болғаннан кейін иіс болады. Есіктің бәрін ашып тастайды. Балалар сырт киіммен отыр.

Темір көпір ауылының жоғарғы сынып балалары көрші ауылдағы интернатқа жатып оқиды. 10 шақтысы қатынайды. Барлығын жинаса 100-ден асады екен. Сондықтан орта мектеп салынса, оқушылар ешқайда сабылмай, ауылға да адам тұрақтар еді дейді тұрғындар.

Нәдірбек Есенбаев, Теміркөпір ауылының тұрғыны:

- Мектеп жүрген жерде ел болады. Мынау темір жолдың бойы күре жолда тұр. Еш уақытта адам азаймайды. Көшіп келушілер бар. Бірақ мектеп болмаған соң келмей жатыр. Ауылымыздың өспей жатқаны содан.

Осыдан бес жыл бұрын Мұғалжар ауданы басшылары тендер жариялап, құрылысқа жер белгілепті. Бірақ «қазынадан ақша бөлінбеді» деген желеумен мердігермен арадағы келісімшартты тоқтатып қойған. Енді құрылысты облыс әкімдігі өз мойнына алып, «биыл бастаймыз» деп уәде беріп отыр.  

Жеңісбек Ақберген, Ақтөбе облысы білім басқармасы басшысының орынбасары:

- Мектеп құрылысы осы жылға үстіміздегі жылға жоспарланған. Жоба-смет құжаттамаға өзгерістер енгізіліп, қаражат бөлінген жағдайда құрылысты биыл бастау жоспарлануда. Мердігер анықталғаннан кейін биыл салынады.

Орта мектеп салуға 242 миллион теңге керек дейді шенеуніктер. Оны енді жақында өтетін мәслихат сессиясында депутаттардан сұрайтын болады. Олар бекітсе, Темір көпір балалары келесі оқу жылында жаңа мектепке барады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!