Өйткені жөртөлеге толған су астында жоғары кернеулі электр желілері қалған. Ал қызыл судан арнасы толған Көкпекті өзені бөгетті жарып, 10 шақты баспананы шайып кете жаздады. Дер кезінде жеткен 200 сарбаз бөгетті түні бойы жамаумен алысқан.   

Қарағандының қиырындағы Молдавская көшесі маңынан өтетін Көкпекті өзені кеше түнде бөгетті бұзып кетті. Қызыл су көтерген мұз кесектері алдымен кеп қора-қопсыны ұрған. Мал жанымен тым-тырақай қашқан 10 шақты үй тұрғындары туыстарын паналапты. Айтуларынша, кеше түс ауа бөгет сыр бере бастағанда-ақ құтқарушыларға хабарлаған. «Бірақ олардың емес, қаршадай балалардың арқасында аман қалдық», - дейді.

Базаралы Қожахметов, Қарағанды қаласының тұрғыны:

- ТЖМ келіп тұрды ғой, не күрек жоқ, не айыр жоқ, не материал жоқ. Халықтан сұрап, анаданмынадан сұрады. Қайта әскерилер келіп тасыды. Таң атқанға дейін ұйықтамай тасыды. Бұлар да әлдекімнің мәпелеп өсірген баласы ғой.

Қаладағы Бұқпа өзенінің бойына салынған жаңа үй тұрғындары өткен түнді қанақүй мен жақындарыда өткізді. Жертөлеге су толған соң  жоғарғы кернеулі электр сымдарынан өрт шығу қаупі артып, жарық сөндірілген. Әзірге бұл үйлерден су сорылып, айналасына бөгет қаланып жатыр. Енді биліктегілер өзеннің үстіне салынған үйдің заңға сәйкестігі мен тұруға жарамдылығын тексермек.  

Ермағанбет Бөлекбаев, Қарағанды қаласының әкімі:

- Негізі үш үй де қауіпті жерде тұр. Бұл 2012 жылға дейін су қорғау аймақтары деген болмаған. Соған дейін алған жерлер ғой. Сосын сатқан. Басқа кісілер алған да, басқаға сатқан. Сатып алған кісі осы жерге үй салған.  Су кеткеннен кейін сараптама ұйымын шақырамыз. Жайкүйін қарасын, болмаса сүріледі.  

Сонымен қатар баспана салуға рұқсат берген және құрылысты қадағалағандар жауапқа алынады. Өйткені тексеру қорытындысы полицияға беріледі. Мұны естіген тұрғындардың есі шықты. Қыруар ақшаға жаңа баспана алғандар ертеңгі күнін ойлап мазасы қашты.

Төлеутай Нығметжанова, Қарағанды қаласының тұрғыны:

- 2018 жылға дейін мұнда құрылыс жүргізуге рұқсат болмаған екен. Сонда бұл баспана қалай салынды? Кім рұқсат берді? Расымен біз өзеннің үстінде тұрып жатырмыз. Осылар елдің көз жасы, тағдырымен ойнағанды қашан қояды екен. Енді баспанасыз далада қалайын деп тұрмыз.

Қала әкімі тұрғындардың мәселесімен су кеткен соң тыңғылықты айналысамыз дейді. Ал әзірге қала көшелеріне жайылған қызыл сумен арпалысып жатыр. Тізеден асатын су көше мен аулаларды басып, елдің қозғалысын қиындатты. Соның салдарынан бүгін екі мектеп оқушылары онлайн форматта қайта оқыды. Өйткені №101 мен №102 гимназиялар бала түгілі, ересек өте алмайтын аралда қалған.

Бүгінге дейін қаладан 500 текше метр су шығарылған. Биліктегілер маңайдағы қардың әлі толық еріп бітпегенін айтады. Қызыл су әлі келеді және оған бүгін-ертең жауатын жауын-шашын да қосылады. Қала басшылығы бәріне дайынбыз деп сендірді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!