Арнамыздың төл туындысының көрсетілімі алдағы күзге жоспарланып отыр.

КТК өз көрермендері үшін тың форматтағы картинаның түсіріліміне кірісіп кетті. Сериал кеме апатынан кейін ерекше қабілетке ие болған Закира жайында. Оқыс оқиғадан кейін көріпкел су бетінен бейнелер көріп, күрделі оқиғалардың сырын аша бастайды. Осылайша бұрын-соңды жұртшылық көрмеген көріністер бас кейіпкердің көзқарасымен беріледі. Закираны сомдау Тараз театрының актрисасына бұйырыпты. Енді Галина Қойшыбаева сериал соңына жеткенше Алматы қаласында болады.

Галина Қойшыбаева, актриса:

- Видео жіберіңіз деді. Кішкене ғана видео түсіріп жібердім. Сонымен «бекітті» деді. Ары қарай ойлана бастадым. Бұл енді менің театрда жұмыс істеп, 40 жылдан аса жұмыс істегенде де көріпкелдің рөлін ойнап көрген емеспін.  Емші болса, емдеуге болар еді. Көріпкел болған соң, жамандықтың алдын алып, болдырмауға тырысып отырады.

Түсірілім КТК телеарнасының бірнеше павильонында және Алматы көшелерінде жүріп жатыр. Ерекше қасиетке ие кейіпкерге көрінетін құбылыстарды камера арқылы шынайы көрсетуге барынша тырысамыз дейді режиссер. Енді тек көріпкелге ғана аян дүниелерді көрермен де көріп-біле алады.

Ботагөз Кенішбай, режиссер:

- Екі түсірілім тобы жұмыс істейді. жасайды. Жобаның ерекшелігі — әр сериясы бір оқиға. Бір оқиға басталып, сол серияда аяқталады. Мистика жанрыы. Отандық сериалдардың ішінде жиі кездеспейтін жанр. Қызығы мен қиындығына толы жанр десе де болады. Және көрерменге қандай да бір тылсым дүние арқашан қызық.

Көріпкел Закираға ұлы Айдын мен көршісі Нұрай көмектеседі. Картина 80 бөлімнен тұрады. Қазір алғашқы бөлімдері түсіріліп жатыр. Жаз бойы таспаланатын мистика детективтің премьерасы алдағы күзге жоспарланып отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!