Қазірге дейін ауылда 200-ден астам ірі қара өлген. Ал мал дәрігерлері ауылға тараған қандай ауру екенін анықтай алар емес. Сондықтан карантин де жарияланбапты.

- Қазір аурып жатқандар каждый үйде екіденүштен тұр. Бәрі аурып жатыр. Әр үйде екіденүштен. Керек болса қазір аралап көрсетеміз. Дәлел бар!

Алдындағы малының арам қатқанын көрген Еркіншілік ауылының тұрғындары әбден ашынған. Өйткені көктем шыға  ірі қара атаулының аузынан ақ көбік ағып сілекейі шұбыра бастаған. Төрт түлікке кесел келді деп күдіктенгендер бірден мал дәрігері мен әкімдікке барыпты. Бірақ одан бері бір ай өтсе де, індеттің неден тарағаны белгісіз дейді жиналғандар.

Байжігіт Мұсаұлы, Еркіншілік ауылының тұрғыны:

- Мынадай сұмдықты мен бұрынсоңды Қазақстанда көргем жоқ. Малдың мына сияқты қырылғанын. Осы бір пәле келгелі бір тыныштық та болған жоқ, демалыс та болған жоқ. Мына Үкіметтен ешбір жәрдем, ветврач деген адам көрген жоқпыз. Сельсовет дегеннің қайда екенін білмейміз. Қаншама күн болды.Мына жас жігітердің арқасында емдеп-домдап келе жатырмыз.

Тұрғындар ірі қарасын аман алып қалу үшін  өздері емдей бастаған. Инфекцияға қарсы егілетін дәрілерді өздері  сатып алған. Бірақ қандай аурудан емдеп жатқанын да білмейді.Екпе жасап тұрған да мал дәрігері емес.Әбден болмаған соң сиырдың сілекейін жуып, аузын жанармаймен шәйған. Каустикалық соданы езіп те малдың езуіне құйыпты. Ал арам қатқан 200 бас сиырды ауыл сыртына апарып өртеп жібердік дейді.  

«Малым жанымның садағасы» деп малмен күнелтіп отырған тұрғындар қазір не істерін білмей отыр. Көпшілігі көктем келіп өріске шыққан ірі қарасын қорасына қайта қамап қойған. Ал бәрінен бұрын мемлекеттік бағдарлама арқылы несиеге  табын- табын сиыр сатып алған шаруалар әбден сасып отыр. 

Еркіншілік ауылынан 159 адам өзін өзі жұмыспен қамтуға  мемлекеттен 3 миллионнан 9 миллион теңгеге дейін несие алған. Ал қырылған малға мемлекет бір тиын да өтемақы төлемеуі мүмкін. Өйткені әлі күнге ауылды жайлаған не індет екені белгісіз.

Талғат Жүнісов, Ақмола облысы ветеринария басқармасының басшысы:

- Зертханаға сараптамаға материалын жібердік. Сілекейін жібердік, қан сынамаларын жібердік. Бірақ алғашқы бетте диагностикум болмады. Сондықтан тексере алмады. Ақырғы кезде келген сынаманың нәтижесі бойынша аусыл ауруы емес, ящур емес деген сараптамамыз бар.

Қазір індет жайлаған Еркіншілік ауылына 5 миллион теңгенің дәрі-дәрмегі жөнелтілген. Бірақ оны тұрғындар өз қаражатына сатып алуға тиіс. Әзірге 10 мың ірі қарасы бар ауыл жұрты  осы ауру малдың етін жеп, сүтін ішіп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!