Бұқтырма еліміздегі ең ірі су қоймаларының бірі. Жаздың жайдарлы күндері мұнда келушілердің қатары қалың. Алексей Голубев жыл сайын су қоймасына отбасымен келіп демалуды дәстүрге айналдырған. Ал биыл су деңгейі төмендеп, жағажайдағы қонақ үйлер тым алыста қалған. Оның үстіне жағалаудың айналасын балдыр баса бастаған.

Алексей Голубев:

- Бұқтырма су қоймасына жазда отбасыммен демалуға келуге қонақ үйге алдын ала тапсырыс бермек болғанмын. Алайда су тартылып, демалыс орындарының барлығы алыста қалып қалған. Енді екі ойда тұрмын. Не істерімді білмеймін. Отбасым мен кеңесуге тура келіп тұр.

Қоймадағы су тартылса аймақ тұрғындары электр жарығынсыз да қалуы мүмкін. Себебі, таяз су Ертіс өзеніндегі Каскад су электр станциясы турбиналарының жұмысына зиян келтіреді. Бірақ мамандар жұртты сабыр сақтауға шақырып отыр.

Светлана Нищенко, "АЭС Өскемен ГЭС" және "АЭС Шүлбі ГЭС" ЖШС қоғаммен байланыс жөніндегі маманы:

- Өскемен су электр станциясы штаттық режимде жұмыс істейді. Өскемен су қоймасының деңгейі гидроагрегаттардың үздіксіз жұмыс істеуіне жеткілікті. Алаңдауға ешқандай себеп жоқ.

Қоймадағы судың тартылуы жарықпен қатар, балыққа да зиян келтіруі мүмкін дейді тұрғындар. Алайда мамандар су жәндіктеріне айтарлықтай қауіп жоқ деп отыр. 

Фархат Байбазаров, «Зайсан - Ертіс» облысаралық балық шаруашылығы инспекциясының басшысы:

- Қазір балықтың  уылдырық  шашуына байланысты Бұқтырма су қоймасы ешқандай зиян келтірмейді. Зиян келу қаупі Тұранғы шығанағы ғана. Оның су қоймасынан бөлініп қалу қаупі бар. Қазір біз, инспекция қызметкерлері және ғылыми институт қызметкерлерімен мониторинг жүргізіп жатырмыз.

Бұқтырманың тартылып кетуіне қыста қардың аз түсуі себеп екен. Сондықтан алдағы уақытта жауын-шашын көп болса, қойма қайта толады деген үміт бар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!