Сүйіктісінен айрылған досына көмектеспек болған жолдастарының іс-әрекеті немен аяқталарын білгіңіз келсе, кинотеатрға асығыңыз.

Фильм үш достың бастан кешкен оқиғалары жайында. Басты кейіпкер Әлішерді бірнеше жыл бірге тұрған ғашығы той күні тастап кетеді. Махаббат дертінен айығу үшін ол демалыс орнына аттанады. Бұл екі жолдасының жоспары. Нағыз шым-шытырық осы кезде басталады.

Тимур Бақтыбаев, продюсер:

- Қазақстанда кинолардың жалпы жанры, қандай менталды түрде түсірілетінін білесіздер: тойтомалақ, ата мен ене, ене мен келін. Ал мен ондай тақырыптан алшақ, басқа тақырыпта түсіргім келеді. Халық “Басқа фильм бар ма?” деп сұрайды үнемі. Басқа жанрды, басқа актерлерді сұрайды. Міне, осы кинода ең бірінші түскен актерлер бар.

Дегенмен сапар Әлішер ойлағандай сәтті өтпейді. Жолдастары діттеген жеріне жеткен бойда Карла және Зара есімді қыздармен танысады. Оның бірін танымал актриса Жәния Джуринская сомдайды. Ал оның өмірдегі жолдасы Данияр Хизметовке Әлішердің рөлі бұйырған.

Жәния Джуринская, актриса:

- Мұндай жанрда киноға алғаш рет түсіп отырмын. Түсірілім барысында дайын сценарийді өзгертіп, мүлдем басқаша форматта ойнауымызға тура келген сәттер де кездесті. Бірақ күйеуіміз екеуміз жақсы алып шықтық деп ойлаймын. Туынды да бір күліп, бір қорқып, түрлі көңілкүйді бастан өткересіздер.

Фильм Алматы қаласында 13 күннің ішінде түсірілген. Ендеше екі жолдасының досына ұйымдастырған тосын оқиғаның немен аяқталатының білгіңіз келсе, «Розыгрыш по-казахский»  туындысын көріңіз. Картина бүгіннен бастап барлық кинотеатрда көрсетіледі.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!