КТК кезекті картинаның түсіріліміне кірісіп кетті. 15 сериалы туындының алғашқы эпизодтары арнамыздың бірнеше павильонында таспаланып жатыр.

Фильм бас қалаға қызмет ауыстырған полиция полковнигі жайында. Ол қайтыс болған тергеу бөлімінің бастығының орнына барады. Жаңа жұмысында ең алдымен «жүрек талмасынан қайтыс болды» делінген әріптесіне қатысты тергеу жүргізбек. Басты кейіпкер Әділеттің рөлін - Сырым Қашқабаев сомдайды.

Сырым Қашқабаев, актер:

- Экшнға толы сахналар көп. Атыс, шабыс, төбелес, жүгіріс. Сол жағынан кішкене физикалық тұрғыдан алып шыға аламыз ба деген қорқыныш болды. Бірақ басталмас бұрын бір жұмадай Номадтың каскадерларымен дайындықтан өттік. Менің кейіпкерім өзінің ортасын, жалпы қоғамды жақсартуға тырысатын, соған кәміл сенетін кейіпкер.

Режиссердің айтуынша, мұндай жанрдағы сериалдың сюжетіне қаңтар оқиғасы түрткі болыпты. Яғни басты мақсат- тәртіп сақшыларының бұрын соңды айтылмаған, көрсетілмеген ерлігін елге жеткізу. Тергеп-тексеруден бөлек, төбелес пен атысқа толы өмірлерін баз қалпында баяндағылары келіпті. 

 Дарина Манапова, режиссер:

- Кастингте актерларды ұзақ таңдап алдық. Әсіресе жастар көп. Олар түрлі жанрдағы туындыларға түскенімен, дәл экшнге толы фильмге түсу тәжірибелерінде жоқ. Сол үшін ісқимылдар мен төбелестері арнайы жігіттерді жалдап үйреттік. Енді актерларымыздың өз рөлдерін қалай алып шығары бізге де қызық болып тұр.

Фильм тек Алматы қаласында түсірілмек. Криминалға толы оқиғасда сезім мен махаббатқа да орын бар. Кино ұжымы картинаның көрермендер көңілінен шығатынына сенімді. Сериалдың көрсетілімі күзге жоспарланып отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!