Жыл басынан бері Нұр-Сұлтанда 453 адам энтеровируспен ауырыпты. Олардың барлығы дерлік бала. Бұл вирус күн ыстықта, ылғалды жерде тез таралады. Індет жұқтырған бүлдіршіндер су бұрқақта шомылған. Кейін тексеру жүргізген вирусологтардың өздері көше бойындағы фонтандардың ластығынан шошып отыр. Елордадағы Абай мен Жеңіс даңғылдарының қиылысындағы субұрқақтан энтеровирус қоздырғыштарын тапқан. Сарыарқа ауданы әкімдігі алдындағы, «Жастар» театры аумағындағы және «Өмір ағашы» су бұрқақтары да қауіпті дейді.

Аяжан Қалқабекова, Нұр-Сұлтан қалалық Санитарлық-эпидемиологиялық бақылау департаментінің ресми өкілі:

- Әртүрлі субұрқақтарға түсіруден аулақ болыңыздар. Себебі, ондай субұрқақтарға көбінесе яғни, қаңғыбас  иттер, түрлі құстар шомылып, су ішеді.Олар барлығымызға белгілі вирус тасымалдаушылар. Және де ауа райының ыстығына байланысты суда микро организмдер тез тарайды.

Ал ел астанасындағы субұрқақтардың тазалығымен айналысатын мамандар санитарлардың сөзіне сене алар емес. Күніне субұрқақтарды залалсыздандырып отыратындарын айтады. Тіпті, ешқашан лайланған емес деп ақталды.

Владимир Назаров:

- Біз суға химиялық реагентерді қосамыз. Ол хлор, альгицид. Залалсыздандыру жұмыстары жүргізіледі. Қоспалардан кейбір адамдарда аллергия болу мүмкін. Бірақ күн ыстықта субұрқақта балалар көп болады. Барлық жерде шомылуға болмайтыны туралы ескерту тақтайшалар орнатылған. Айпұл саламыз деп те ескертеміз.

Дегенмен, мамандар балаларды көше бойындағы мұндай жерлерде шомылмақ түгілі, қол-аяғын суға батырмасын деп отыр.  Ал індет жұқтырған баланың қызуы көтеріліп, тамағы мен мұрны бітіп, терісінде дақ пайда болады екен. Оны емдеу кем дегенде он күнге созылады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!