Ақорданың телеграм каналында жарияланған суреттерде президент пен қазақстандық делегация қажылық тәртібіне сай киінген. Қазақстанның бас мүфтиі Наурызбай қажы Тағанұлы да мемлекет басшысымен бірге Қағба ішінде қолын жайып, құлшылық етті. Сауд Арабиясына Қасым-Жомарт Тоқаев король Салман бен Әбдел Әзиз Әл Саудтың шақыруымен барды. Ресми сапар барысында президент Сауд Арабиясындағы ірі компания басшыларымен, Ислам Даму банкінің президентімен, Ислам ынтымақтастығы ұйымының бас хатшысымен және тағы да басқа маңызды тұлғалармен кездесті. Сондай-ақ, мемлекет басшысы елдің іскер топ өкілдерінің қатысуымен өткен инвестициялық дөңгелек үстелге қатысты. Ол өз сөзінде экономикалық дамудың болашағына екі мемлекет көзқарастарының ұқсастығын атап өтті. Кездесу нәтижесінде тараптар 13 маңызды құжатқа қол қойды.

Қасым-Жомарт Тоқаев, Қазақстан Республикасының Президенті:

- «Saudi Vision-2030» бағдарламасы мен біздің «Қазақстан-2050» стратегиясы экономиканы әртараптандыру, шикізатқа тәуелділікті төмендету, адами капиталға инвестиция салу, түптеп келгенде, жоғары дамыған елдердің қатарына кіру арқылы ұлттық дамуға қол жеткізуді көздейді. Осы мүмкіндікті пайдалана отырып, Қазақстанның Сауд Арабиясымен арадағы екіжақты ынтымақтастықты нығайтуға және кеңейтуге бейілді екенін растағым келеді. Бүгін осында бүкіл әлемде айтарлықтай табыстарға қол жеткізген Сауд Арабиясының ірі компанияларының басшылары қатысып отыр. Мен бәріңізді өзара тиімді негізде Қазақстанда бірлесе жұмыс істеуге шақырамын.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!