Елорданың оң жағалауында орналасқан жатақхана жарты ғасыр жасаған. Содан болар, қарт адамдай күйі кетіп күйреп тұр. Үйдің түсі де тым сұрықсыз. Іргетасын әдейі үңгіп тастаған ба дерсіз. Ал, қатты жел тұрған кезде мұндағы тұрғындардың тіпті зере-құты қашады.

Әсел Қасенова, Нұр-Сұлтан қаласының тұрғыны:

- Тасы үгітіліп түсіп жатады. Өзі біздебір есік қой. Сол есіктен шыққан кезде адамдардың басына түсіп жатады. Қабырғалар ұлап жатыр. Кәдімгі қант секілді үгітіліп түсіп жатыр. Үйдің жағдайы өте нашар.

Азаматтар үйдің жыртығын жамау мүмкін емес дейді. Сондықтан елорда әкімдігінен сүріп тастауды сұрап отыр.

Үйдің 65 пайызын апатты деп растаған құжаттары да бар. Сарапшы компанияның ол шешімді шығарып бергеніне жыл өтсе де, әкімдік тарапынан еш әрекет жоқ. 150 бөлмелік жатақханада күнелтіп жатқан азаматтар өздері мен балаларының өміріне алаңдаулы. Қолқаны қапқан лас ауада өскен балақайларға да дерт  жабысқыш.

Бибігүл Жұбанәлиева, Нұр-Сұлтан қаласының тұрғыны:

- Төрт тұрамын. Бес баланың анасымын. Үйімде осы бесінші қабатқа келгелі су өтеді. Дәлізде жүруге болмайды. Линолеумнің астында ағаш ол қытырлап, балалар су кешеді. Ауырады, пневмониемен әрине. Жыл сайын бізде екі аптадай мектепке бармай үйде емделіп отарымз. Қаражатымыз сол дәріге кетеді. 

Төбеден су аққан сайын ашық-шашық күйде тұрған тоқ сымдарына түсіп қаламыз ба деп те үрейіміз ұшады дейді. Жаңбыр жауса, жертөленің суға толып қалатыны бөлек әңгіме. Соның салдарынан ондағы құбырлар шіріп кеткен. Тіпті мұндағы кей бөлмелерден тіршілік белгісі білінбейді. 

Терезесі түсіп, жел азынаған аядай ғана бөлме осы үйдің ас бөлмесі екен. Бірақ олай деген аты ғана. Әйтпесе тұрғындар мұнда біраздан бері бас сұқпайды. Өйткені көктеген қабырға төбемізге құлай ма деп қорқады.

Мұндағылар арқа-жарқа болып қонақ шақырудан қалғалы қашан. Әкімдік тарапынан қайран болмағасын, амалдап өздері қарекет қылғанмен, нәтижесі көңіл көншітпейді дейді. 

Айгүл Биболова, Нұр-Сұлтан қаласының тұрғыны:

- Мынау біздің тұрып жатқан бөлмелеріміз. Ылғал басқан. Жиһазды да ылғал басты. Есіктерін былай ашып қоямыз. Киім ілеміз де, ашып қоямыз. Өйткені киімдер көгеріп жатыр, көк иіс шығады. Екі рет жөндеу жасадық. Жөндеуге келмейді. Жақсылап қарасаңыз, құлап қала береді.

Елорда әкімдігін шыбын жанын шүберекке түйген тұрғындардың жайы аса алаңдатпайтын секілді. 2027 жылға дейін сүрілетін үйлердің тізіміне кірмейді екен. Себебі, қалада осы уақыт аралағында сүріп тастауға жоспарланған 1000-нан астам үй бар. Әрі бұл жатақхананың жағдайы тым мүшкіл деуге келмейді дегенге саяды әкімдік жауабы.

Нұр-Сұлтан қаласының әкімдігі:

- Нұр-сұлтан қаласы әкімдігінің жанындағы 2020-2025 жылдарға арналған  тұрғын үй қорын реновациялау жобасын іске асыру жөніндегі мүшесі, НұрСұлтан қаласы мәслихатының депутаты Б. К. Котыревтің 2021 жылғы 23-желтоқсандағы комиссия отырысында Луи Пастер көшесіндегі жатақханаға қатысты мәселе қосымша қаралды. Комиссия шешімімен ұсынылған: серіктестік коммуналдық меншікке беретін тұрғын үйдің тепе-теңдігін арттырған жағдайда, аталған үйді таяу жылдарға арналған бұзу жоспарына енгізу мүмкіндігін қарастырылады.

Ал Пастер көшесіндегі жатақхана тұрғындарының төзімі таусылудың сәл-ақ алдында. Әкімдік тарапынан әрекет күтеміз дегенше, өзіміз жазым болмасақ екен деп жанын шүберекке түйіп күн кешуден басқа амалы қалмағандай. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!