Тарс еткен дауыспен бір тағдыр үзілді. Сұмдық көріністі түрін көрсетпеуін өтінген жігіт түсірген. Айтуынша, 25-ші қабаттағы балконнан үздіксіз айқайлаған дауыс естіліпті.

-  Жиырма бесінші қабаттан естілмеді деймін де, жарты сағаттай айқайлады. Артынанполиция кірді, сол кезде секірді ғой ...

Видеода мәйіттің бетін жауып, сырт көзден қалқалап қойыпты. Жедел криминалистика зертханасы түн ортасына дейін жұмыс істеген.

25 қабатты кешеннің біраз тұрғыны түнде болған жағдайдан бейхабар. Оқыс оқиға түнгі сағат он шамасында болған. Қоршалған аумақты таң атқанша ретке келтіргендіктен, бұл жерде адам өлді деп көбі ойламайды.

Қас-қағым сәт – үш секундтың ішінде 25-ші қабаттан құлдилаған қыз  жерге жалп етіп түскен. Түн тыныштығын бұзып тұрғындарды түршіктірген оқиға орындағы көрініс. Қан ізін жуып тастаған.

Тұрғын үй кешеніндегі күзетші марқұмның бұл жерде тұрмағанын айтады. 25-ші қабатта негізінен тәуліктеп жалға берілетін пәтерлер екен. Ал марқұм пәтердің емес, дәліздің балконынан секірген. 26 жастағы қыздың сөмкесінен онкологиялық ауруға шалдыққанын айғақтайтын анықтаманы көрген куәгерлер де бар екен.

- Олай істеме деп бақырғанын естігем. Сөмкесінде онкология анализдері бар екен. Онкологиямен ауырған екен.

Полиция аталмыш жайтқа қатысты тергеуді жалғастырып жатыр. Әзірге бір нәрсені дөп басып айту қиын.

Салтанат Әзірбек, Алматы қаласы ПД ресми өкілі:

- Қайтыс болған азаматшаның жеке басы анықталды. Ол 26 жастағы қыз. Бостандық ауданы полиция басқармасында ҚК 105-бабымен қылмыстық іс қозғалып, тергеу басталып кетті. Болған оқиғаның толық мән-жайы мен себеп-салдары анықталатын болады.

Қыз секірер алдында біреуге аудиохабарлама жібергенін естігендер де бар. Жас қызды өлімге не, әлде кім итермелегенін енді тергеушілер анықтайды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!