Теміртау жарылыс: Тұрғындар арыз жазса, баспанамен қамтылады
Теміртауда жарылыс болған үйдің тұрғындары бүгін пәтерінен аман қалған дүние-мүлкін көшіре бастады. Өйткені кешелі бері апатты баспанаға ешкім аттап баспаған. Үйдің маңы күзетіліп тұр.
Автор: Саят Дәулетжанұлы
17.08.2022
Апат болған үйдің тұрғындары кешелі бері үйіне кіре алмаған. Аранайы комиссияның жұмысы аяқталмайынша, баспанаға жол жабық. Бүгін құжаттары мен аса қажет деген заттарын алуға бір үйден бір адам ғана баспанаға кіріп жатыр. Оның өзінде қасына құтқарушы қосып, басына каска кигізеді.
Үйдегі 80 пәтердің 19-ында тұратындар қаладағы политехникалық колледждің жатақханасына жатқызылған. Қалғаны туыстарын сағалап кеткен. Қала билігі үйдегі тұрғындардан арыз түссе, баспанамен қамтимыз дейді. Сондықтан қазір қанша отбасыға қандай көмек берілгені жөніндегі ақпарат үнемі жаңартылып жатыр. Ал өң мен түстің арасында қоныс аударғандар дел-сал күйде.
Анна Майжолова , Теміртау қаласының тұрғыны:
- Жатақханада қанша тұратынымызды білмеймін. Итім бір жақта, мысықты достарым алды. Күйеуім екеуіміз жатақханаға орналастық. Ертең студенттер келе бастаса, қайда барамыз?
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
