Әлібек Қуантыров, ҚР Ұлттық экономика министрі:

- Жыл сайын есептеу жүргізіледі. Өткен жылдың инвестициялық кірісі алынып, есепшоттарға бөлінеді. 2024 жылдың 1-қаңтарынан бастап балаларға 2023 жылдың табысынан қаражат аударылады.

Ал әзірге ол соманың қанша болатыны белгісіз. Бұған дейін 18 жасқа толған әр баланың есепшотында шамамен 3 жарым мың доллар болуы мүмкін деген болжам айтылған. Бірақ ұлттық экономика министрі Әлібек Қуантыров бұл 2024 жылдан бастап дүниге келетін балақайларға қатысты деп түсіндірді. Яғни кімде-кім президент бастамасы күшіне енген күннен бастап кәмелетке дейін көп уақыт өткізсе, есепшотындағы ақша да көбірек болмақ.

Еске салайық, 1-қыркүйектегі халыққа Жолдауында мемлекет басшысы Қасым-Жомарт Тоқаев «Ұлттық қор — балаларға» деген жаңа бағдарламаны әзірлеуді тапсырған. Оған сәйкес, Ұлттық қордың инвестициялық табысынан жыл сайын елдегі әр баланың есепшотына ақша аударылады. Оны ешкімнің шешіп алуға құқы болмайды. Есепшот иесі тек 18-ге толғанда ғана баспана алуға немесе оқу ақысын төлеуге жарата алады. Қазіргі статистика бойынша жыл сайын елімізде 400 мыңдай сәби дүниеге келеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!