Өмір бойы кеңседе отырған Қайраттың кенеттен бағы жанып, арнайы тапсырмаға  аттанатын болады. Бірақ басшылық қандай қауіпке кез боларын ескертпейді. Аңғал агенттің рөлін танымал актер Алмат Сақатов сомдайды.

Алмат Сақатов, актер:

- Таза еңбектің киносы. Өйткені ішінде төбелестер бар, қырғын бар, соғыс бар, соның бәрін түсіру үшін расында да керемет еңбек керек. Екіншіден, менің таң қалғаным, Тимур 12-15 күннің ар жақ, бер жағында бір фильм түсіріп тастайды екен. Аз уақытта түсірілген кино шалағай болады деп ойлайтынбыз. Жоқ. Ол еңбекке байланысты екен.

- Неге «Сәуле Николаевна»?

- Анамның аты – Сәуле, әкемнің – Николай, содан мені кіші Сәуле Николаевна деп атайды.

Ал қауіпті миссиядағы Қайраттың әріптесі Сәуле Николаеваның рөлін Қарлығаш Мұхамеджанова ойнады. Голливудтың Джеймс Бондына бір шеті пародия болатын ерекше жанрдағы туындының продюсері – Тимур Бақтыбаев. Осыған дейін де бірнеше комедиясымен көрерменнің көңілінен шыққан сақа маман бұл фильм жас талғамайтынын айтады. Актерлік құрамды да асықпай таңдап, ерекше тандем жасаған.

Тимур Бақтыбаев, фильм продюсері:

- Бұл қазақстандық стиль емес. Яғни біздің менталды кино деп айтпаймын. Бұл батыстық стильдегі, голлтвудтық стильдегі фильм деп айтсам, қателеспеймін. Себебі, бұл енді кезекті бесінші фильм болғаннан кейін бір өзгеше фильм түсіргім келді. Түсірдік деп ойлаймын, актерлік құрам, оның ішіндегі сценарийі, жалпы қиын локациялар, оның ішінде біздің түсірген күрделі сахналар осымен ерекшеленеді.

Батыстық стильмен тыңнан түрен салмақ туынды бүгіннен бастап елдің барлық кинотеатрында көрсетіледі. «Миссия выполниманың» шым-шытырық оқиғасына куә болам десеңіз, сіз де билет алған көрерменнің қатарын көбейтіңіз.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!