Екі күн бұрын 9-сынып оқушысы қала шетіндегі демалыс базасының аумағында қарда жүретін көлікпен бір топ адамды қағып кеткен. Оқиға орнында 40 жастағы әйел қаза тапты. Ал тізгінде болған оқушы дін аман.

Осыдан екі күн бұрын қайғылы оқиға болған туристік базаның айналасы жым-жырт. Сырғанақ басында да, канат жолағының маңында да ешкім жоқ. Сенбі күні осы жерде 15 жастағы оқушы қарда жүретін көлікпен бір топ адамды қағып кеткен. Қатты соққыдан 40 жастағы келіншек қаза тапты. Оның қолындағы бір жарым жастағы бөбегі ауруханада жатыр. Ал тағы үш оқушы мен 49 жастағы ер-азамат жарақат алған.16 жастағы қыз баланың жағдайы ауыр дейді дәрігерлер.

Ербол Жапақов, Ақтөбе облысы ана мен бала денсаулығын қорғау орталығының бас дәрігері:

- Үш науқас травматология бөлімінде жатыр. Балалардың жалпы жағдайы тұрақты. Диагнозы: бас жарақаты. Толық емделіп жатыр. Бір науқас жансақтау бөлімінде. Қыздың жағдайы ауыр, оның жамбасы сынып, басынан жарақат алған.

Қарда жүретін көлікті тізгіндеген 9-сынып оқушысы екен. Тәртіп сақшыларының айтуынша, ол техниканы туыстарынан сұрап алған. Мұндай көлікті жүргізуге ешқандай куәлік керек емес көрінеді. Қазір тергеу жүріп жатыр.

Ерболат Сарқұлов, Ақтөбе облысы ПД баспасөз қызметінің жетекшісі:

- Қарда жүретін көлік баланың туысына тиесілі екен. Аталған фактімен Ақтөбе облысының полиция департаменті ҚР ҚК 345-бабы 3-бөлімен қылмыстық іс қозғап, тергеу жүргізіп жатыр.

Ақтөбеде қысқы демалыс ұйымдастырумен айналысатын 21 туристік орын бар. Бірақ бірде-бірінің шана мен коньки тебетін сырғанағынан бастап, жалға беретін қарда жүретін көлікке арналған жолының қауіпсіздігі тексерілмейді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!