Сөйтіп мемлекеттік қызметкерге тәжірибе  жасап көреді. Вакцинаның шенеуніктерге қалай әсер еткені қызық болса, жаңа туындыны тамашалаңыз. Картина еліміздің барлық кинотеатрында бүгіннен бастап көрсетіліп жатыр.

«Вакцина от коррупции» фильмі мемқызметкер Ардақ пен Руслан жайында. Басты рөлдерді Қайрат Әділгерей мен Рүстем Жаныманов сомдайды. Бірі мол қаражат қайда болса, сол жерден пайда көргісі келетін прокурор. Ал екіншісі «жаным – арымның садағасы» дейтін қарттар үйінің директоры. Алайда тәжіриенің құрбанына айналған олардың өмірі түбегейлі өзгеріп шыға келеді дейді продюсер.

Құралай Анарбекова, продюсер:

- Басты мақсат – жақсылық жағын көздеу. Әрине, коррупциямен күресу. Идея қиялдан шықты. Егер осындай вакцина тапсақ, еліміз қалай өзгереді? Адамдар өзін қалай көрсетеді екен деген арманнан шыққан идея. Және де бұл идеяны біз тек қана күлкімен емес, драмамен, махабббатпен, үлкенге құрмет, кішіге ізет дегендей құндылықпен шығардық.

Ғалымдар екпенің екі түрін жасап шығарады. Оны сыбайлас жемқорлыққа қарсы қызметтегілер басты кейіпкерлердің сусынына қосып береді. Сөйтіп бұрын-соңды пара алмаған директор жеке бас пайдасын ойлайтын нағыз арамзаға айналады. Керісінше, қалтасын қампайтқанды жақсы көретін прокурор өзі ісіне адал шенеунік болып шыға келеді.

Қайрат Әділгерей, актер:

- Былай ойлап қарасаңыз, кез келген адамның бойында ақшаға деген махаббат бар. Кішкентай ақша болсын, үлкен ақша болсын. Өзім орнына қойып көрдім. Егер де мен осындай лауазымда болатын болсам, пара ала аламын ба, ала алмаймын ба? Сосын сценарий  образын ашуға тырыстық.

Фильм Алматы қаласында 22 күнде түсірілген. Осылайша шым-шытырық күйді бастан кешетін қос атқамінердің арекеті қалай өзгереді? Ендеше еліміздің барлық кинотеатрында бүгіннен бастап көрсетіліп жатқан «Вакцина от коррупции» фильмін тамашалаңыздар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!