Өйткені спортзалдың шатыры мен терезелерінде саңылаулар болғасын, ғимараттың іші ылғи азынап тұрады дейді. Кемшілікті директордың өзі тізіп берсе де, аудандағы шенділер өздеріне де мердігерге де шаң жуытпай отыр.

Сылақтары сыпырылып түсіп қалған. Қабырғалары оқ тигендей тесік-тесік. Бақандай 200 миллионнан астам теңгеге күрделі жөндеуден өткен Кеген ауданына қарасты Жалаңаш ауылындағы мектептің күйі осы. Пайдалануға екі жыл бұрын ғана берілсе де, уақыт өткен сайын жаңа олқылықтары құдды бір тосын сый сынды сау ете қалады дейді жұрт.

Баян Мұсаева, мұғалім:

- Биылғы қыста да, былтырғы қыста да мына жерде бір баланың ойнауына мүмкіндік жоқ болды. Амалдың жоғынан дене шынықтыру пәнінің мұғалімдері келіп ойнатады. Бірақ, олар терлейді. Балалалар ауырады, тері қатады. Кезінде жөндеуді біздің ауылдың балдары біраз істеп еді. Солар айтты, жөндеуді істеген кісілер қоқыспен қабырға тұрғызды деді. Сонда мына қабырғаның іші техникалық жағдайға сай емес жасаған болуы керек. 

Алдымен қол астындағы мұғалімінің айтқанымен келіспей айқайласа, кеткен директор артынша мектептің кемшіліктерін өзі тізіп берді. Айтуынша, нысанға толықтай жөндеу жүргізген құрылыс компаниясының спортзалға келгенде ақшасы жетпей қалған.

Марат Адинов, С. Бейсенбетұлы атындағы орта мектептің директоры:

- Спортзалымыз суық болды. Былтырдан бері мердігер «Тунас» деген компания жұмыс істеді. Көбік материал құйылмай қалған. Оның бәрінен су тамшылады. Стандартқа сай емес деп, тұтас 110 терезені бір рет салып, алғызып тастап қайта салды. Шатырды екі рет ауыстырды. Олардың жапқан ағаштары нашар болды. Оны бір рет алып, қайта жапсырды.

Осындай олқылықтары бола тұра, мектепті дайын деп қабылдап алған кім? Бұл сұрақтың нақты жауабын аудандағы атқамінерлерден ала алмадық. Не айтқысы келмейді, не білмейтіннің кейпін танытады.

Мұратжан Мәсіханов, Кеген ауданы білім бөлімінің басшысы:

- Өзімнің өызметке келгеніме 10 ай болды. Оны қабылдап алған менен бұрынғы уақытша міндетін атқарушы. Ол кісі орнынан кетіп қалған жоқ. Маман болатын. Қазіргі таңда басқа жұмыстарға ауысып кетті. Есімін ұмытып тұрмын.

Шенеунік мектепте әлі де кемшілік барын мойындап отыр. Айтуынша, құрылыс компаниясы өзі жіберген олқылықтарды осы оқу жылы аяқталғанға дейін реттеп береді. Ал балаларының денсаулығына алаңдаған ата-аналардан бастап мектеп директорына дейін егер Серіктестік шала істеген жұмысын реттемесе, сотқа береміз деп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!