2018 жылдан бері «Қазанат», «Сарайшық», «Байсанат», «Фэмали таун» деп аталатын төрт кооперативке  миллиондаған қаржысын салған атыраулықтар алданып қалдық деп шу щығарды. Төрт бірдей тұрғын үй кешеніне 200-ге жуық салымшы жарты миллиард теңгеден астам ақша беріпті. Тіпті кейбірі екі пәтердің ақысын алдын ала төлеп тастаған. 2019 жылы басталған құрылысты бір жылдан кейін мемлекеттік сәулет құрылысы басқармасы заңсыз деп тоқтатып тастаған. Содан бері салымшылар сенделіп жүр.

Эдуард Айтасов:

- Мен екі бөлмелі пәтерге 20 миллион салып едім. Кеңсесі Атырау қаласының орталығында орналасқан 2021 жылы ақша салдық. Содан кейін ол компания жоғалып кетті. Алты тұрғын үй кешені келіп отыр. Бәрі де өзіміз сияқты қарапайым халық. Атырау қаласында жарнамаларын көріп, бәрі келіп ақшасын салды.

Амандық Абдолов:

- Бұл жерде тұрғындардың бір бөлігі ақшасын қайтаруды сұрайды, Бір бөлігі әлі де үйді қайтарар деген үмітте. Бірақ, негізі үйге сенім жоқ. Біреулер 5 миллионнан бастап, 20 миллиондай салған. Менің «Қазанатта» 6 миллионым жатыр. Маған ол 60 миллиондай ақша.

Жиналғандардың әкімдікке де өкпесі қара қазандай. Себебі үйлердің құжаты заңсыз болса, құрылысқа қалай рұқсат берді деп ашулы. 

Айнұр Молдағалиев:

- Төрт бірдей тұрғын үй кешені салынып жатады. Ал мұны мемелкеттік сәулет құрылысы неге қадағаламаған?! Рұқсат құжатсыз дейді. Бақылау қайда болды? Әкімдік қайда қарады? Қалада салынып жатқан құрылыстар неге бақылауға алынбайды?

200-ге жуық салымшы құзырлы органдарға арыз жазған. Қазір тәртіп сақшылары тергеу жүргізіп жатыр. Тіпті бір күдікті қамауға да алыныпты. 

Мейірім Ердәулет, Атырау облысы ПД ресми өкілі:

- Тағайындалған сараптамалар күрделі сараптама қатарына жатады. Және оның қорытындысына сәйкес , яғни кооперативтердің құрылтайшыларына қатысты заңды шешім қабылданады. Қамауға алу немесе қандай да бір заңды бағасы беріліп, құқықтық жауапкершлік  қарастырылады.

Бұл салымшылар бұған дейін де бірнеше рет наразылыққа шыққан. Сол кезде Атырау облысы мемлекеттік сәулет құрылыс басқармасындағылар аталған тұрғын үй кешендерін  аяқтауға инвестор іздейміз деп уәде берген. Бұл жолы инвестор табу біздің құзырымызға жатпайды деп жалтарып кетті. Ал салы суға кеткен салымшылар енді сотқа жүгінейін деп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!