2004 жылы туған күдікті қазір қамауда. Бүкіл Жамбыл ауданы жұртының жағасын ұстатқан қылмыс қалай болған? 

Мал бағуға кетіп қайта оралмаған 39 жастағы Нұрсұлтан Нүсіпханның жүрек тұсына екі рет пышақ сұғылған. Айдың-күннің аманында Жамбыл ауданына қарасты Қарақыстақ ауылының нағыз бұзақысының қолынан қаза болды дейді марқұмның жақындары. Айтуларнша, ол осы уақытқа дейін ақша бопсалап, тыныштық бермей келген. Ал қайғылы оқиға болған күні, яғни 11 маусымда Нұрсұлтанның шотында қомақты қаражат жатқанын байқап қойыпты.

Жақыпбек Күлияқызы, марқұмның анасы:

-  Балама той жасаймын, пұл жиып жүрмін деген еді. Ана балалар біресе қарыз, біресе тағы бірдеңе сұрайды екен. Бірге жүрген балалар ғой деп, ештеңе ойламадық. Сөйтіп жүрсек, ақшасы жоқ, телефоны жоқ болып, өлігі табылды.  

Күдікті 2004 жылғы бозбала. Оның 40-қа таяп қалған еңгезердей ер адамға қалай әлі жеткені де белгілі. Нұрсұлтан Нүсіпхан туғаннан екінші топтағы мүгедек, бір аяғы мен қолы істемейді. Ел-жұрттың малын бағып, отбасын асырап отырған. Енді кәмелетке толмаған бес баласы артында аңырап қалды. Бауырынан айырылған марқұмның ет жақындары «қаныпезер жазадан құтылып кете ме» деп қорқады.

Бекмұрат Нүсіпхан, ағасы:

- Оның бауырлары, ауылдың халқы біледі, кімніңкім екенін, солар айтты, ҰҚК, прокурор дей ме, сондай екен. Бұл жерде кімнің құқығы тапталып жатыр? Қылмыскердің құқығы ма? Жоқ, әлде мына шиеттей қалған жетімдердің құқығы ма? Әкем қайда десе, қайдан тауып беремін? 

Қазір күдікті қамауда отыр. Адам өлтіру бабымен іс қозғалыпты. Қылмысы дәлелденсе, 8 жылдан 15 жылға дейін сотталады. 

Ернар Сайділдин, Алматы облысы ПД ресми өкілі:

- Аталған дерек ҚР ҚК 99-бабы, 1-бөлігі бойынша аудандық полицияда тіркелді. Жедел іздестірілу іс-шарасы барысында ізін суытпай, 2004 жылғы күдіктіні анықтап ұстады. Қазір сотмедициналық сараптама тағайындау мен барлық тергеу шарасы жүргізіліп жатыр. Ұсталған адам аудандық полицияның уақытша ұстау изоляторына қамалды.

Бүгін Нұрсұлтанның жаназасы өтіп, денесі мәңгілікке жер қойынына тапсырылды. Артында шырылдап қалған ағайын-туысы тергеудің әділ жүріп, болмашы ақшаға бола бес баланы жартылай жетім қалдырған күдіктінің  қатаң жазаға тартылуын талап етіп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!