Жаз келіп, демалыс маусымы бастала сала, билет те таусылады. Баяғы жартас, сол жартас. Өзгерген ештеңе жоқ. Тек пысықайлардың айла-шарғысы ғана түрлене түсті. Діттеген жерге жедел жетуді қалағандар есебін тауып, еселеп төлеп, вагонға еніп жатыр.

Енді бірі вокзал маңын жағалап жүр. Билет таппай сергелдеңге түскендерден көз сүрінеді. Билетке қол жеткізу қиындағасын, жұрт өзге қатынас түріне көз тастайды.

- Билеттер мүлде жоқ. Уақытында билет таппайсың. Таксимен кетеміз қымбат болса да.

- Билет жоқ. Күту парағына қойғанбыз. Ол да болмайтын сияқты. Күткен сайын уақыт өтіп жатыр. Күткен сайын билеттің бағасы көтеріліп жатыр. Пойызға болмағасын,самолетті қарап отырмыз енді.

Билет жоқ деп шырылдап, шамырқанбас үшін оны 45 күн бұрын сатылымға шыға сала, шап беріп алу керек. Онда да үлгергендері ғана алады.

- Біз билетті бір ай бұрын алып қойдық. Ерте алдық. Осы пойыздың өзіне әрең таптық қой.

- 45 күн бұрын таңғы 7-де билеттер сатылымға шыға сала алдық. Сол күні түсте қарап едік, билеттер бітті деп шықты. Сапарымызды билет үшін кейінге шегеруге тура келді.

Әлбетте адамның бәрі 45 күн бұрын сапарын жоспарлай бермейді. Аяқасты жолға шығуға бекінгендердің билет таппай шабылатыны содан. Ал билет кассада да, интернетте де емес, олжаға батып жүрген алып-сатарлардың қалтасында. "Қазақстан темір жолы" бұл бір кетпейтін кесел, бітпейтін былықтың жолын кесу үшін ашықтықтықты мақсат етіп, «күту парағын» іске қосқан еді. Сол арқылы күту тізіміне енгендер автоматты түрде жол жүруден бас тартқан адамдардың орнын баса алады. Жалпы билет тапшылығының басты себептерінің бірі - вагон жетіспеушілігі. Мәселен, былтыр ақауы бар 251 жолаушы вагоны эксплуатациядан алынған. Ал оның орнын жабу үшін біршама уақыт күтуге тура келеді. Жыл сайын пойыз арқылы 14 млн жолаушы, оның 4 жарым миллионы жаз мезгілінде қатынайды екен.

Темірлан Дүйсекеев, "Жолаушылар тасымалы" АҚ баспасөз хатшысы:

- 2025 жылдан бастап, 5 жыл бойы 500 талаптарға сай жаңа вагон әкелуді жоспарлап отырмыз. Ал жылдың аяғына дейін ресейлік 50 жоғары сапалы вагон елге келуі тиіс. Жалпы қазіргі таңда Бурабай мен Алакөлге елдің әр түкпірінен қосымша 6 жаңа маршрут қосылды. Жолаушыларға билеттерді ресми сайттан ертерек алуға ал билет жоқ болса, күту парағын пайдалануға кеңес береміз. Делдалдар ол сайт арқылы көптеп билет ала алмайды. Себебі онда әр адамның жеке деректері жазылады.

Ұлттық компания өкілі арнайы мониторингтік топ тексеру барысында билетсіз жүрген азаматтар мен оларды өткізіп жіберетін жолсеріктер әлі де кездесетінін жасырмады. Ал Көліктегі полиция департаменті жыл басынан бері заңсыз билет сату бойынша бар-жоғы 4 деректі анықтапты. Жалпы құн үстіне құн қосқан алыпсатарларға 70 мың теңге көлемінде ғана айыппұл салынады не 5 тәулікке дейін қамалады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!