Жыл сайын нысанды жалға алу бағасын да өсіре беретіні базардағылардың бас ауруына айналған. Саудагерлердің талабын КТК тілшісі тыңдап келді.

Базар саудагерлерінің бүгінде салы суға кеткен. Айтуларынша, соңғы бір аптада басшылықтан көп қысым көрген. Сауда орнына жауапты әкімшілік бутик алдына қойылған шатырларға тыйым салып жатыр екен. Соның салдарынан күннің астында қалған тауарлардың өңі кетіп, жарамсыз бола бастапты.

Бұл жерде алты жылдан бері табыс тауып отырғанның бірі– Нәзипа Оспанова. Айтуынша, шатырды алып тастап еді, аптап ыстықтан аяқ-киімінің өлшемі кішірейіп қалған.

Нәзипа Оспанов, саудагер:

- Екі мыңға сатып аламыз. Міне, мынаны енді біреу екі мыңға ала ма? Күннің астында тұрып кішірейіп қалған. Екі мыңға алып, енді мың теңгеден ба? Қоқысқа лақтырамын. Мысалы, мынаны сіз аласыз ба? Алмайсыз. Бүкіл тауарым бүлініп жатыр.

Мұндағы кәсіпкерлердің көбі «Саяхат» базары жабылған соң, осында ауысып келген. Содан бері сауда нүктесін жалға алу ақысы да қалтаға салмақ салып барады дейді. Жыл сайын көтерілетін баға бүгінде 100 мың теңгеден асып кеткен.

Мөлдір Тастемірова, саудагер:

- Осыдан төрт жыл алды, 2 жарым миллионға сатып алдық. Көпбалалы анамын. Ай сайын жалға алу құнын көтереді. Біз базарға келген кезде 50 мың, 20 мың, 25 мың төлейтінбіз. Қазір әр орынды сатып алсандар, жалға беру құны тегін деген. Ең құрығанда жартысын төлейсіндер деген. Қазір, міне, 110 мың теңге төлейміз. Талабым: жалдау құнын түсірсін, алдымызға шатыр құрғызсын. Қаншама тауарымыз құрып жатыр!

Көп ұзамай кәсіпкерлер алдына базарды жалға берушінің өзі де келді. Бүгіннен бастап сауда нысанының дәл көшеге қарайтын тұсындағы барлық шатырын қалай да алып тастаймыз деді.

Сейітмұрат Қожахмет, базар басшысы:

- Осы уақытқа дейін бутиктердің алдына жаңа ашылғасын, саудасын істесін деп көмектестік, көз жұмдық. Мына тұрған жол үкімет жолы. Бұл жерден президентте өтеді, сырт елдің адамдары да өтеді. Ал мына палаткалар ережеге сай келмейді. Әкімдіктің талабы сондай. Осы уақытқа дейін біз бұл кісілерге қарасып келдік, жиналыста ашық айттық, ескерттік. Бүгіннен бастап шатыр қоюға болмайды.

Базар басшылығы ай сайынғы жалға беру ақысын төмендетуге ниетті емес. Бірақ 20 күннің ішінде бірыңғай шатыр қою жағын қарастырады. Тек оған кәсіпкерлердің күмәні бар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!