Алматыда жолақы құны өсті
Қымбатшылық кезегі — жолақыда! Енді Алматыда қоғамдық көлікпен жүру құны 150 емес — 200 теңге. Бұл автобус, метро және троллейбустарда қолма-қол төлеу ақысы. Ал картамен немесе мобильді қосымша арқылы 80 теңгенің орнына 100 теңге төлейтін болады.
Автор: Салтанат Шырынхан
09.08.2023
Жыл басынан бері тарифті көтеруді ұсынған жергілікті билік бүгін нақты бағаны бекітті. Мұндай қадам бюджет шығынын азайту үшін қажет екен. Қыспаққа алған қымбатшылық салдарынан ескі тариф тасымалдаушылар шығынын өтей алмай жатқан көрінеді. Яғни қоғамдық көлікке қажет дизель, газ, қосалқы бөлшек құны жыл сайын қымбаттап жатыр. Ал жолақы бағасы 11 жылдан бері өзгермеген. Бұл әкімдіктің есебінше бюджетке үш есе салмақ. Соның салдарынан субсидия көлемі де шарықтап кеткен. Яғни мемлекет тарапынан көрсетілетін қаржылай көмек соңғы бес жылдықта 14 есеге өсіпті. Бастапқыда 7 миллиард теңге болса, былтыр 115 миллиард теңгеге бір-ақ жеткен. Мұның барлығы «қазынаға үлкен ауыртпалық» деген атқамінерлер жолақыны көтеруден басқа амал жоқ деп отыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
