Ынтымақ ауылындағы жалғыз білім ошағын мектеп деуге аузың бармайды. Мал бордақылауға арналған кеңсені мектеп ретінде қолданып келеді екен. 34 жылда күрделі жөндеу көрмеген ғимараттың жауын жауса үстінен су өтеді. Ал, едендері шіріп жатыр. Көне ғимаратты мұғалімдер мен ата-аналар өздері жамаумен әзер ұстап отыр.

Бақытбек Найзабаев, Ынтымақ ауылының тұрғыны:

- Мынау желге ұшып кетеді, жамаймыз шиферінің бәрін. Жаңағы кісі айтып отыр ғой ағаштарының бәрін ауылда пайға бөлінген қоралар бар, солардың ағашын әкеп жабыстырдық. 23 рет желге ұшты. Мен өзім 19 жыл строительмін, соны жамаудың бәрін осы жерде 56 ер мұғалім бар, артындағы детсад ашылды, детсадты көрдіңіздер столовый боп тұрған жерін 6 мұғаліммен ауылдың бәрі салды сол.

Қазір, мұнда 205 оқушы білім алады. Арнайы пән кабинеттері бұл білім ошағы үшін арман. Орын жетіспеген соң 10 мен 11 сынып оқушылары көрші ауылдарға барып оқиды. Мұғалімдер бөлмесі болмаған соң, 33 педагог дәлізде сығылысып отырып сабаққа дайындалады. Онсызда орын жетіспейтін мектепте қажетке жарар 10 кабинеттің бірін асхана міндетті болу керек деген соң биылдан бастап тамақтануға беруге мәжбүр. Яғни мұғалімдер енді бала сыйғызу туралы тағы бас қатыру керек.

Берік Аспанов, Сұлтан Ысқақов атындағы мектеп директорының орынбасары:

- Бір сынып комплектісінде 25 оқушы болатын болса бізде 25 бала сияқтын кабинетіміз жоқ қазір. Сол себепті оқушы саны 19-20 болған кезде 2-ге бөлінеді. Сонда бір класта 12 баладан отырады. Бөліп тастаймыз иә. Сол себепті қазір 2,3,4 сыныптар бәрі 2 сыныптан оқиды. + Енді арнайы пән кабинеттері жоқ. Тек қана сабақ өтумен шектеледі. Ал дене шынықтыру күн жылы уақытта алаңымыз бар, спорт алаңы, сол жерде өтеді. Ал қыс уақытында шахмат, шашка, тоғызқұмалақ кабинетте өтеміз.

Мұғалімдер бірнеше жылдан бері ғимарат керек деп хат жазса, ата-аналар облыс әкімдеріне дейін барған екен. Сөйтіп, 20-шы жылы 981 миллион теңгеге мектеп салмақ болған кезде, қаржы жоқ деп кері қайтарылыпты. Енді сол 200 орындық мектептің құны бір миллиард 642 миллион теңгеге дейін көтеріліп кетіпті. Облыстық ақжағалылар қолдап жіберсе биыл жаңа мектеп құрылысы басталмақ.

Мұхитбек Сәрсенбеков, Ордабасы аудандық білім бөлімінің әдіскері:

- Облыстық білім басқармасына тапсырылып, облыстық білім басқармасы арқылы құрылыс басқармасына ұсыныс жасалынды. Осы алдағы қыркүйек айындағы облыс мәслихаттың сессиясына ұсынылуда. Егер облыс мәслихаттың сессиясымен қолдау тауып, қаржы қаралған жағдайда биылғы жылы басталып құрылысы, келесі жылмен жалғасып, келесі жылдың қыркүйек айына пайдалануға берілу жоспарлануда.

3 жылда құрылыс құны екі есе өскен мектепті атқамінерлер қолдап жіберсе Ынтымақ ауылының оқушылары келер оқу жылын спорт зал, акт залы мен мұғалімдер бөлмесіне дейін бар жаңа мектепте қарсы алмақ. Ал, егер қолдамаса қазіргідей қырық жамау ескі ғимаратта оқуын жалғастырудан басқа амалдары жоқ.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!