Петропавл шетінде болған қайғылы оқиғаны естіген жұрт жағасын ұстады. Өрттің қатты жанғаны сонша, қызыл жалын қаланың екінші шетінен көрінген. Көршілерінің айтуынша, кіреберіс бөлмеде тұтанған от бірден күш алып, баспананы күлге айналдырған. Ақыры екі бүлдіршін анасымен бірге көз жұмды.

Юрий Сухарев, көршісі:

- Терезеден секіріп түсіп, іште балаларым мен әйелім қалды деп айғай салды. Тұра жүгірдім, дем алу мүмкін емес еді. Өрт сөндірушілер тез жетті. Бірақ құтқарып қала алмады. Жапжақсы отбасы болатын. Аналары жұмыс істейтін. Бәлендей, проблемасы жоқ еді. Бұрыннан танушы едім, амандасып жүретін.

Көршілерінің айтуынша, бұл үйге 80 жылдай болған. Өте ескі. Әжелерінен мұраға қалған екен. Бес адам тұрып жатқан. Үй иесінің анасы сол күні жұмыста болыпты. Өрт сөндірушілер хабар жеткен соң-ақ бес минутта келген. Бірақ екі баласымен далаға ұмытылған ананы құтқара алмапты.

Назымбек Елемесов, Петропавл ТЖБ бастығы:

- Өрт орнына Петропавл қаласының нөмірі №5 өрт сөндіру бөлімінің жеке қрамы үш цистернамен 15 адам құрамында шықты. Өрт орнына жету уақыты 5 минутты құрады. Алдын ала болжам бойынша, өрт фактісі бойынша қылмыстық іс қозғалды. Қажет сараптамалар тағайындалды.

Өрттен аман шыққан үй иесі мен жұмыста болған оның анасына жергілікті әкімдік көмек береміз деп отыр.

Әсем Айтулова, Петропавл әкімдігінің баспасөз хатшысы:

- Жергілікті атқарушы орган тарапынан жерлеу рәсіміне , уақытша жалдамалы пәтерге және басқа да қажеттіліктерге арнайы қаржы бөлінетін болады. Бұл жерге облыс басшылығы, қала басшылығы кеше түнде келді. Қаза тапқандардың туысқандарына қайғырып көңіл айтамыз.

Өрт-техникалық, медициналық сараптама дайын болғаннан кейін ғана адам өмірін жалмаған өрттің шығу себебі анықталады. Ұшқын әбден ескірген электр сымдарының тұйықталуынан болуы мүмкін деген болжам бар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!