Осы оқиғадан кейін білім ошағындағы өзге оқушылардың ата-аналары бүгін өре түрегелді. Олар әңгімені жылы жабуға тырысқан мектеп басшылығының әрекетіне наразы.

Арам ойын іске асырмақ болған күзетшінің әрекеті мектептегі бейнебақылау камерасына жазылып қалған. Егде жастағы ер адам қолындағы құжатты қызға табыстап, күтпеген жерден оны құшақтай жөнеледі. Кейін тіпті ернінен де сүйіп алады.

Юлия Диденко, қыздың анасы:

- 10-шы сыныпта оқитын көршіміз менің қызымнан мектеп мұғалімі күзетшіге тастап кеткен құжатты алып кетуін сұрады. Қызым барса, ол кісі қатты мас екен. Өзінің айтуынша, күзетші ернінен сүйген. Осы оқиғадан кейін оның жақындары маған келіп: «әкем 20 жылдан бері маскүнемдіктен емделіп жатыр» деп пара ұсынып, әңгімені жылы жабуын сұрады.

Бұл сұмдықтың бәрі өткен сенбіде Алматыдағы №160 мектептің тура кіреберісінде болыпты. Білім ошағының алдына бүгін өзге оқушылардың ата-аналары да жиналып шу шығарды. Кінәнің бәрі маскүнемдікпен ауыратын адамды жұмысқа қабылдаған директордың мойнында деп отыр.

Людмила Яловенко:

- Біріншіден, бізде құқық қорғау органдарына сұрағымыз бар. Не үшін кішкентай балаға тиіскені үшін оған әкімшілік жаза қолданды? Небәрі 15 тәулікке ғана қамалған. Екіншіден, мектептің директоры мұның бәрін жылы жапқысы келеді. Бүгін біздің келгенімізді көріп, артқы есіктен қашып кетті. Таңнан бері күтіп отырмыз.

Таңнан бері күткізген директор ақыры келді. Оқиға болған күні жұмыста жоқ едім дейді. Осы мектепте жарты жыл жұмыс істеп келген күзетшіден бұрын-соңды оғаш қылығын байқамапты. Ал оны жұмысқа қабылдаған жекеменшік компания деп, өзіне шаң жуытпады.

Гүлшат Әминова, №160 Жалпы білім беретін мектептің директоры:

- Жекеменшік күзет қызметін биыл тыл 18 наурыздан бастап «Алтын әлем групп» Серіктестігі күзет қызметін атқаруда. Біздің тарапымыздан «Алтын әлем групп» Серіктестігімен келісімшартты бұзып, шағым түсіріп, хабарлама жібердік. Тәртіптік жаза пән мұғаліміне алынды. Одан кейін тәрбие ісі жөніндегі орынбасарға берілді. Және әкімшілік тарапынан сөгіс берілді.

Полицейлер ұсақ бұзақылық үшін күдіктінің әзірге 15 тәулікке ғана қамалғанын растады. Десе де қылмыстық іс бойынша шешім шықпағанын жеткізді. Тергеу жүріп жатыр. Қозғалған бапқа сәйкес, күзетші 12 жылға дейін бас бостандығынан айырылуы мүмкін.

Салтанат Әзірбек, Алматы қаласы ПД ресми өкілі:

- Алматы ПД аталған дерек бойынша Алатау ауданы полиция басқармасымен ҚР ҚК 124бабы 1-бөлігіне сәйкес тергеу жүргізіп жатыр. Сараптамалар тағайындалды. Оқиғаның мән-жайы анықталуда. Сонымен қатар аталмыш сезікті әкімшілік кодексінің 434-бабы нормалары бойынша сот шешімімімен әкімшілік қамауға алынды.

Ата-аналар директорды да жазаға тарту керек деп санайды. Орнын босатпаса, балаларын бұл мектепке апармауға бекініп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!