Мұқтарованың адвокаттары сот талқылауын қысқартылған тәртіппен өткізуді сұрады. Оған жуырда ғана сотталушының утилизация алымынан қалтасына басқан 920 миллион теңгені бірден мемлекетке қайтаруы себеп. Мұқтарованың өзі көз жасына ерік беріп, дайындаған мәтінін де оқуға шамасы болмады. Айтуынша, істі болғанын білмей, онкологиялық дертін емдеуге шетел асқан. Тек Интерпол өкілдері оны ұстауға келгенде ғана мән-жайды алғаш естіпті.

Сотталушы бүгінде жеті жылға сотталған компания директоры Светлана Коротенконың тұзағына оңбай түсіп қалдым деп ант-су ішіп отыр. Коротенко оған «Оператор РОП»- ты басқаруға ұсыныс жасағанда бар былықтан бейхабар болыпты. Жауап алу барысында Мұқтарова дивиденд ретінде алған 920 миллион теңгені пайдаланбағанын, тек шотында жатқанын айтты.

Бес ай бұрын Астана қылмыстық істер жөніндегі ауданаралық соты "Оператор РОП" басшылары мен онымен ауыз жаласқан экология министрінің бірінші орынбасары соттаған болатын.

Шынар Мұқтарова сотталушы:

- Мен бұл Қазақстан экологиясы үшін пайдалы болады деп ойладым. Құжаттардың қырысырына үңілмей, бірқатар құжатқа қол қойдым. Нақты қандай құжатқа қол қойғанымды қазір айтып бере алмаймын. Мен өз кінәмді толық мойындаймын. Мені құзырлы органдардың іздеп жатқанын білмедім. Қазақстанға өз еркіммен оралдым. Қазір менің науқас анам бар, ол Алматыда, көмекке мұқтаж.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!