Ал тапсырыс пен ақшаны қабылдаған келіншектің өзі ұшты Өкүйлі жоғалған. Тауарын күтіп шаршаған жұрт қыруар қаржыны қайтарсын деп, жаппай полицияға арыз жазып жатыр.

Ботагөз Қасенова Қытай зауыттарынан арзан бағада тауар әкелемін деген жарнамаға қызыққандардың бірі. Келіншек осыдан тоғыз ай бұрын мссенжердегі топқа тіркеліп, тұрмыстық техниканың түр-түріне тапсырыс берген. Ақшасын да сол мезетте төлеп отырыпты. Одан бөлек, кеден бекетінен өткізу мен осындағы қойманың жалға алу ақысының да қаражатын өздері көтеріп алған.

Ботагөз Қасенова:

- Тұрмыстық техника, ыдысаяқ, жиһаз және тағы басқа ұсақ-түйектерге тапсырыс бердік. Уақытында әкеліп беремін деген сөзіне сеніп, біз де клиенттерге саудалай бастадық.Біз алаяққа алданып, өзге сатып алушыларға құр сурет сатқан болып тұрмыз. Тоғыз ай өтті, не тауар, не ақшаны қайтарған жоқ. Мен 40 миллионға тапсырыс берген болатынмын.

Ботагөз сынды Альбина Асылбековаға алғандардың саны бүгінде 500-ге жуықтайды. Тауарды онлайн таңдап, ақшаны алдын ала аударған келіншектер бір ғана Алматыда емес, еліміздің түкпір-түкпірінен тіркелген екен. Ұлту Ізтілеуова – Қарағанды қаласының тумасы.

Ұлту Ізтілеуова:

- 26 шілдеде Альбинаның көмекшісі Әлия есімді қыз хабарласып, тапсырыс берген көрпемді алып кету керегін айтты. Екі күннен соң күйеуім екеуміз Қарағандыдан жеттік. Сөйтсем көрпенің қабы мен мақтаны ұстатып, мынаны тігу керек дейді. Қытайдан дайын болып келуі керек дүниені өзімізге жасаңдар дегеніне аңтаң болдым. Тапсырыс берген тауарымды алу керек болғасын, сонда қалып тіктім. Бірақ артынша қуып жіберіп, қолыма бірдебір көрпені ұстатпады. 

 Мәселен, 200-250 мың тұратын тоңазтқыштарды ватсаптағы топта 50-70 мың теңге деп көрсеткен. Ал 150 мыңдық ыдыс-аяқтар небәрі 25-30 мыңнан саудаланған. Осылайша ақшаға қарық боламыз дегендер тіпті таныстарына да жаппай тарата бастаған. Ақыр аяғында не ақша, не тауар жоқ, көбі клиенттеріне қыруар қаражат қарыз болған.

Лейла Барьял:

- Қоймаға екі елдің арасында тауар таситын адамды іздеп барғанымызда, ол әйел жағама жармаса кетті. Ол жердегі алты адамның екеуі келіншек. Жанымда күйеуім барына қарамастан, мені жұлып жеуге тырысып, ешқандай тауар жоқ екенін, енді келмеуім керегін айтты. Әрең дегенде сытылып шығып, полиция шақырдым. Бірақ олар қашып үлгерді.

Қойма қазір жабық тұр. Алайда өзін осындағы жұмысшымын деп таныстырған азамат бұл нысан «өзге қожайындікі» дейді.

Өткір, жұмысшы:

- Ол кісілер қоймаға келіп жүр ме? Жаңағы Бәке дегеніңіз де...

- Иә, келіп жүр.

- Ал оның Альбинаға қатысы бар ма?

- Иә, енді ол бірлесіп істегеннен кейін, затты осы қоймаға қойып береді ғой. Кейде заты болмағанда өзі алып келеді. Бірақ ол өзінің заты. Альбинаның заты емес ол кезде. Альбинаның қоймасы өртенгеннен кейін, форс-мажор болғаннан кейін, жағдайы қиын болғандықтан, оған қойма алу өте ауыр болып жатыр.

Бүгін қойма алдына жиналғандар Альбина Асылбековадан жауап алғысы келеді. Бірақ бірде-бір рет жүзін көрсетпеген келіншек сан рет телефон нөмірін де ауыстырған. «Алдандық» деген әйелдер жаппай полицияға шағым түсірген.

Салтанат Әзірбек, Алматы ПД ресми өкілі:

- Биыл қыркүйек айында төрт азамат Алатау ауданы полиция басқармасына ресми шағым түсірген. Бұл дерек ҚР ҚК 190-бабы, 3-тармағы бойынша тіркеліп, іздестіру және процессуалдық әрекеттер жүзеге асырылуда. Күдікті міндетті түрде ұсталып, тиісті процессуалдық шаралар өткізіледі.

Бүгінде Альбина Асылбекованың келіншектерге берешегі 200 миллион теңгеден асылып жығылады. Сан соғып қалдық деген келіншектер тауарлары қолына тиетініне сенбейді. Тек қыруар қаражатты қайтарсын деген талап қойып отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!