Баукеспелер қорадан жетектеп алып шығып кеткен сәйгүлік бірнеше күннен кейін өзінің қорасына қайтып келді, бірақ сойылған күйде. Тергеушілер тергеу өткен соң мұны иесіне қолхатпен табыстаған. Бірақ жылқы десе ішкен асын жерге қоятын мал иесі мұны етке де бермей, «өзім жерлеймін» деп отыр. Атбегінің ойы — асылын ит-құсқа жем қылмай көміп тастау. Ағылшын –араб тұқымдас сәйгүлігі кұнанынан бері талай бәйгеде топ жарған. Елдің аузына енді ғана ілініп бабына келген Сарбаз атты сәйгүлік аламанға түскелі жарап тұрған. Соңғы бәйгесінде мәреге атышулы тұлпарды өкшелей келіпті. Тұлпарының пышаққа ілінгенін естігенде есеңгіреп қалған.

Ақжол Ысқоқов, атбегі:

— Көзден жас шығармасақ та, жүрегіміз қан жылады ғой. Тамақ та іше алмай қалдық. Тамақтан ас өтпей қалды, қайта-қайта, ойлап-ойлап. Жүгіртем, желітем. Білесіз ғой. Бәйге алаңына апарып, кортқа апарып, уақытымен бәрі, режимі бар, азығы да, бәрі. Аламан 20-25-тен басталады ғой. Сол 35-ке дайын ат ед ...

Сол түні қырсыққанда қораның аузындағы иті де күшіктеп, бауырын жазбай жатып алған көрінеді. Ұрылардың мұны білген-білмегені білгісіз, бірақ емін-еркін кіріп-шыққанға ұқсайды. Қылмыстан құлағдар болған полиция бірден кенттен шығатын жолдарға бекеттер қойған. Ертеңгі күні кешкілік жүк салғышында жылқының еті бар көлік тоқтатылған.

Айдын Кенжебаев, Ақадыр кентінің учаске инспекторы:

— Басында ешқандай құжат болмағандықтан күдіктендік. Өйткені бәйгеге қосатын ат ұрланды. Құжатын сұрадық, ветеринарлар рұқсат береді ғой. Кабинетте сөйлескен соң өздері айта бастады. «Ұрлықпен сойылған ат, қалаға сатуға апара жатырмыз, бізге бәрібір, ақша болса болды, сату үшін» деп. Басқа түк те айтқан жоқ.

23 және 54 жастағы күдіктілер жергілікті тұрғындар болып шықты. Қазір олар тергеу абақтысында. 10 жылға дейін сотталулары мүмкін. Сондай-ақ иесіне 1 жарым миллион теңге төлеуі тиіс. Ақжол Ысқақов олардың кім екенінен әзірге білмейді. Көріп жатса, мал ұрысы жарап тұрған сәйгүлікті соғымнан қалайша айыра алмағанын сұрағысы келеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!