Көмек түгілі, автобус паркінен бір де-бір адам көңілін сұрап келмеді дейді. Үш баласымен жалғыз қалған ана әділдік іздейді. Үш бірдей адамның өмірін жалмаған апатқа қатысты жаңа деректер.

Әлменбаевтар әулетінде қазір құлаққа ұрған танадай тыныштық. Қарт әке жалғыз ұлының енді қайтып келмейтініне сенгісі жоқ. Марқұм Айдос отбасының жалғыз асыраушысы болған. Микроавтобус айдап, күнделікті нәпақасын тауып жүріпті. Апат болған күні Райымбек даңғылының бойындағы аялдамаға тоқтап бой жазбақ болады. Көліктен түсе бергенінде қоғамдық көлік қағып өтеді.

Қыдырғали Әлменбаев, марқұмның әкесі:

— Егер баламның автобусы тұрмағанда, аялдаманың ішіне кіргенде, білмеймін, қанша адам қырылып, жаяу жүргінші жолдың ішіне кіріп кететін еді. Сол баламның спринтері қанша өмірді сақтап қалды. Көзі шығып кеткен. Жарты басы жоқ. Қолы сынған. Денесінің сау жері жоқ. Машинасын жасап шыққанына екі-ақ күн болған.

Қайғыдан қан жұтқан отбасына марқұмның денесін тану оңайға соқпаған. Қатты соққыдан басының сау-тамтығы қалмапты.

 Айнұр Құсайынова, жесірі:

— Сараптама басы жарылған деді. Білмеймін, айта алмаймын, анау адамның маған түрі таныс емес. Қолын ашып берді, аяғын ашып көрсетті. Сол екеніне көзім жетті. Әлі де сенбейміз, шын айтқанда. Ипотекамызды да төлеп отырған. Бағып-қағып отырған. Екеуі де кінәлі болып отыр. Мен айта алмаймын, бір адам кінәлі деп.

Отағасының артында шырылдап үш қызы қалды. Екеуі де кәмелетке толмапты. Ең үлкені – 19, екіншісі – 12, үшіншісі небәрітөрт жаста. Әсіресе кішкентайы жатса да, тұрса да әкесін іздейді. Қара жамылған отбасы апатқа автобус жүргізушісінің тікелей қатысы барын айтады. Әйелдің де жауапқа тартылуын талап етіп отыр.

Ыбырай Көшербаев, марқұмның досы:

— Ол әйел тірі. Аллаға шүкір, ауруханада, тірі. Ал мұнда менің бауырымның үш қызы қалды. Әйелі өзі пәтерде отыр. Ипотекаға алды. Тапсырыс аламыз. ЖК бар. Сол туралы бала-шағасының нәпақасын тауып, киімін, тамағын осы жігіт тауып беріп отырған. Атан-анасын да осы жігіт асырады.

Ағайын-туыстың марқұмды жер қойнына тапсырып келген беті осы. Енді тергеудің әділ жүріп, күдіктінің қатаң жазаға тартылуын талап етіп отыр. Автобус паркінен өтемақы төлеуді де талап етеді. Бірақ ондағылар асықпайтын сыңайлы. Тіпті көңіл айтуға да жарамаған. Бізбен де тілдесуден бас тартып отыр. Ал әкімдіктегілер апат болған аумақтағы қауіпсіздік шараларын күшейтеміз деп отыр.

Алматы мобильді басқармасы:

— Қазір Қалқаман ықшамауданы мен №7 қалалық клиникалық ауруханасының аялдамасында және Райымбек даңғылында көлік торабын салу жобасы әзірленуде. Көлік торабы №7 аурухана маңында қойылады. Екі блоктан тұрады және жерасты жаяу жүргіншілер өткеліне қосылған. Жолаушыларға үшін екі отырғызу алаңы қарастырылған. Жоба құжаттамасы бүгінде мемлекеттік сараптамадан өткізіліп жатыр. 2024 жылы аяқталады деп жоспарланған.

Әкімдіктің айтуынша бұл өзгерістер қала сыртындағыларға қолайлы әрі қауіпсіз болмақ .

Еске салсақ, апат өткен жұмада Райымбек даңғылының бойында болған. №47 бағыттағы қоғамдық көлік жолдың жиегіндегі бір топ адамды қағып өтті. Үш адам көз жұмып, төртеуі ауруханаға түскен. Апатқа жүргізуші мен жолаушы арасындаға дау себеп. Жолаушы рөлде отырған әйелді жұдырықтай жөнеледі. Соққыдан тізгіндегі әйел есінен танып, автобус бар жылдамдығымен жол жиегіндегілерді жаншып өткен. Қазір қайғылы оқиға қатысты тергеу жүріп жатыр. Күдікті жолаушы екі айға қамауға алынған. Ал жүргізуші әйел ауруханада. Оған алдағы уақытта қандай шара қолданылатыны әзірге белгісіз.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!