Ал жарты жыл бұрын жергілікті билік тағы бюджеттің миллиондарына су жүйелерін жүргізуді бастап, ауыл ішін айнала қазып тастаған. Жұрт енді ауыз суды аңсап жүргенде ой-шұңқырға мал мен адам құлап мертігіп жатыр дейді.

Бадам ауылына қарасты Ордабасы, Ұзынбұлақ, Қылышбұлақ, Баянбұлақ пен Таңбалыбұлақ ауылдарының атауы бұлақ болғанымен, тұрғындары суға жарыған емес. Кеңес үкіметі тұсында мұндағы өзен суы зерттеліп, «ішуге болмайды» деген қорытынды шығарылған. Содан ауыл басынан 127 миллион теңгеге ұңғыма қазылып, су мәселесі шешілгендей болған. Бірақ жерасты суы бірнеше айдан кейін тартылып қалыпты.

Қалдарбек Қынашаев:

— 2012 жылы мұнара салынған. Сол кезде «тәтті су ішіп отыр» деп есеп берілген. Одан кейін сүзгі қойды, ол екі ай ғана істеді. Сол уақыттан бері өзіміздің құдықтан тұщы суымызды ішіп отырмыз. Ауыл-ауыл, төрт бұлағымыз бар. Төрт ауыл құдықтан ішіп отырмыз.

Әр ауылда атам заманнан қазылған құдық бар. Тұщы суды «сіміріп отыр» деп есеп берілген тұрғындары жаяу немесе ат-есегімен осы құдыққа келеді. Дәмі кермек татитын сапасыз судың кесірінен балалар жиі ауырып, түрлі тері ауруына ұшырап отырмыз дейді жиналғандар.

- Мал да ішеді бұны, адам да ішеді. Балалар ауырып жатыр. Әкім «су бердім» дейді. Суды көрдіңіздер, су жоқ. Шлангінің өзі жетпей қалған, 3-4 үйге. Кейде бұның ішіне мал түсіп кетеді. Аламыз да, тазалап, қайта іше береміз, амал жоқ.

12 жыл бұрын 127 миллионға жүргізілген ұңғыманы аз көрді ме, аудан билігі былтыр 94 миллион теңгеге тағы су жүйелерін жүргізбекші болыпты. Жазда келген жұмысшылар төрт ауылдың шетін қазып, кей жерлерге құбыр тастаған. Бірақ сол күйі жұмыс аяқталмады. Енді су аңсап жүрген тұрғындар айнала қазылған орға жығылып жатыр екен.

Ережеп Сәрсенбайұлы:

— Ішіне түсіп жатқан жылқыларды көрдім. Түрегеп тұр, бірақ шыға алмайды. Не былай бара алмайды, бір айғыр түсіп кеткенғ қуалап жүріп, ол кептеліп тұр сол жерде. Міне, қолмен қазып жүріп шығарып алдық. Ұсақ мал шыға алмайды. Төрт жасар ауылдасымның баласы ойнап жүріп ішіне түсіп кетті, шыға алмай, шырылдаған дауысын естіген басқа балалар жүгіріп келіп шығарып алды.

Ал аудан билігі 127 миллиондық су мұнарасы, біріншіден, барлық ауылға су бере алмайды дейді. Екіншіден, сүзгісі істен шығыпты. Сондықтан қымбат болса да, тағы 94 миллион теңге бөлінген.

Қыдырбай Сейітқұл, Ордабасы ауданы әкімінің орынбасары:

 — Бұл жерде кемшілік мердігер есебінен. Бірақ ол жерде судың қысымын тексеріп көреді, трасса жарылса, қайта қазуға тура келеді. Суды қазір жеткізіп береді. Су кеткен жерін қайта қалпына келтіреді. Үш күннің ішінде қайта көмеді.

Жарты жыл бойы қазулы жатқан ор тұрғындар шулаған соң дереу көміле бастады. Бірақ есеп жүзінде тұщы суға қарық болып жатқан жұрт тәтті суға тек биыл жыл ортасында ғана қолы жетеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!