Шашының жартысы түсіп қалған, мойны мен құлағы жара-жара. Елдің жағасын ұстатқан видео. Мұнда кішкентай қыз өзін асырап алған анасынан көрген қорлығын тізбектеп айтып беріп отыр.

Тоғыз жастағы Раминаны асырап алған әйел Еңбекшіқазақ ауданы Ташкенсаз ауылындағы мектептің бірінде география пәнінен сабақ береді. Жеткіншекті қолына биыл жазда алыпты. Бізді көрген бойда бірден қызының мәлімдемесін жоққа шығарды.

Айдам Ниязова, қыздың асыраушысы:

— Ыстық сумен күйдірсем ,денесі көлдіреп тұратын еді. Құлағындағы жара мен шашының түсіп қалуы теміреткімен ауырғанынан. Ал оның ұрды-соқты деп зудыратқанына тоқталсақ, оған біреудің жаттатқызғанын көруге болады. Менің ойымша бұл маған қас адамдардың әрекеті. 

Өзіне қас адамдардың көп болуын ол кезінде мектепте оқу ісінің меңгерушісі болуымен байланыстырды. Раминаны осыдан үш күн бұрын аулада ойнап жүрген жерінен бұрынғы әріптесім алып кетіп, маған қарсы пайдаланды деп отыр. Сондай-ақ асырап алған қызының психологиялық ауытқуы бар екенін жасырмады.

Айдам Ниязова, Қыздың асыраушысы:

— Оның өзіндік қиялы бар. Өмірге басқа көзқараспен қарайды. Мұны психологтар дәлелдеген. Жазда үйге алып келген күні ылғи бір нәрседен қорқып жүрді. Не болып қалды деп сұрасам «маған тиісетін ер адамнан қорқамын» деп айтады. Психолог болса, мұның бәрі оның қиялында деді. Рамина өте көп алдайтын.

Бірақ, жәбір көрдім деген қызды ауруханаға апарған аудандық білім бөліміндегілер дәрігерлердің берген қорытындысынан кейін баланы отбасынан тартып алған.

Зарина Бөлекбаева, Еңбекшіқазақ аудандық білім бөлімінің сектор меңгерушісі: 

— Сол кезде дәрігермен сөйлестім. Гематома балада болды. Сырылғандары. 4-5 күн бұрын орын алған жарақаттар деп. Сөйтіп, ол кісілер бізге заключения жазып берді. 1 күнге больницаға жатқыздық. Келесі күні патронаттық тәрбиешісінен баланы тартып алу әрекетін жасап Жанұяға қайтадан апарып орналастырдық.

Қазір бұл жағдай бойынша қылмыстық іс қозғалған. Полицейлер тергеу жүргізіп жатыр.

Рүстем Әбдірахманов, Алматы облысы ПД бастығының орынбасары:

— Қазіргі уақытта іс бойынша барлық қажетті сараптамалық зерттеулер тағайындалды. Олардың кейбіреулері бойынша қорытындысы дайын. Сондай-ақ, мүдделі адамдардың тізімі белгілі болды. Жақын арада қылмыстық іс бойынша тергеу аяқталады.

Тоғыз жастағы қызды асырап алған әйел де абыройыма нұқсан келді деп полицейлерге арыз жазған екен. Жала жапқандарды анықтауын сұрап отыр. Жеткіншек шын мәнінде азапталды ма, әлде айтып отырғаны жаттанды сөздер ме, оны енді полицейлер анықтайды. Қазір бұл істі Бала құқықтары жөніндегі уәкіл Динара Зәкиева бақылауына алған.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!