Сөйтіп ширек ғасыр емін-еркін жүрген. Қылмыстық топ кезінде жол торып, адам өлтіріп, көліктерін тонап, оны бөлшектеп Ресейге апарып саудалаған.

90-шы жылдары үлкен жолды торуылдап жүк көліктерін тонаған «Жүнісов бандасын»көкшетаулық жұрт әлі ұмыта қойған жоқ. Қылмыстық топ 12 адамды ажал құштырып, мүлкін тонаған. Дәл сол уақытта жолда «Нагоев бандасы» да талайды қан қақсатқан. Бірақ одан бері 30 жылдам астам уақыт өтсе де қандықол қылмыскерлердің бәрі түрмеге тоғытылмаған екен.

«Нагоев бандасы» 10 адамнан құралған екен. Бірнешеуі ішкі істер органдарының бұрынғы қызметкері. Қаскөйлер 1998 жылы мұздай қаруланып, милиция киімін киіп, көліктерді қызметтік ала таяғымен тоқтатқан. Сосын жүргізушісін өлтіріп, көлігін бөлшектеп көрші Ресейге апарып саудалапты. Осындай ауыр қылмыс жасаған 9 адам қолға түскенде, біреуі қашып үлгерсе керек. Ол, міне, 26 жылдан кейін ұсталып отыр.

29 жасында ізін жасырып үлгерген жігіт осы күнге дейін алаңсыз өмір сүрген. Ешкім танымас үшін қауға сақал өсіріп, аты-жөнін, тіпті туған күнін де өзгертіп тастаған. Азаматтық некеде тұрып үш бала өсірген. Оларды да сол жалған атына тіркепті. Өзі астық саудасымен айналысса керек. Бірақ көп жыл өтсе де, ауыр қылмыс болғандықтан жазасы ауыр болуы мүмкін.

Сағындық Жантеміров, Ақмола облысы ПД басқарма бастығының міндетін атқарушы:

- Криминалдық полиция аталған топтың соңғы мүшесін ұстады. Ол 90-шы жылдары қылмыстық жауапкершіліктен жалтарып қашып кеткен. Осы уақытқа дейін Қазақстан аумағында заңсыз құжатпен жасырынып жүрген. Оған қатысты екі немесе одан көп кісі өлтіру, қарақшылық, экономикалық контрабанда және қызметтік шенді заңсыз пайдалану бабы бойынша тергеу басталды.

Бұл азаматтың қатысуымен «Нагоев бандасы» төрт адамды өлтіріп, мәйітін орманға апарып көміп тастаған. Қарақшылық шабуыл жасап, талайды сорлатқан. Осындай ауыр қылмысы үшін тоғыз адамның екеуі өлім жазасына кесіліп, екеуі өмір бойына бас бостандығынан айрылған. Қалғандары ұзақ жылға сотталды. Қазір олардың бірнешеуі жазасын өтеп шықты. Ал енді ғана ұсталған күдіктіге қатысты тергеу жүріп жатыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!