Қайрат Мұсаев:

— Мен 500 мыңға көлігімді сатып төледім. Қалған 500 мың кредит. Кредит төлеп жатырмыз. Не істейміз енді? Қарызға баттық. Жұмыстан шығып кеттік. Мысалы, маған «бір айдың ішінде кетесің» деді. Миллион деген кезде Англия деп айтты. 20 күннен кейін Англияның президенті қайтыс болыпты, оның баласы, қазір болады деді. Болмайтын болып, Польша деді. Польша болмағаннан кейін Нидерланды деді. Әр қаланы айтты. Ұлыбритания деді. Барсаң күзет қойып қойған. Кіргізбейді.

«Алдандық» деген жұрттың бұлай жиналғаны алғаш емес. Былтыр да компанияның кеңсесіне кіре алмай кері қайтқан. Полицияға жаппай арыз түсірсек те, тергеу сол күйі қозғалмады деп отыр. Енді адвокат жалдап, ақшасын қайта даулауға мәжбүр.

Тілеужан Кішкенебаев, адвокат:

— Бұл кісілердің арызданған адамын енді әкеліп жатыр. Кеше тергеудің бастығына айтқанмын «сендер не себептен үш айдан бері арыз түскеннен кейін әкеліп отырсыңдар, неге арыз түскен күні әкелмедіңдер» деп едім, анау-мынау деді, Қазақстанда болмады дейді. Негізі Қазақстаннан еш жаққа кетпеген. Ол жақта ешқандайда жұмыс жоқ екенін айтты. Ол жақ пен компанияның арасында келісім жоқ екенін айтып отыр. Олардың мұндай жұмысқа тұрғызатын мүмкіншіліктері де жоқ екенін анықтап отырмыз.

Қарашаны қан қақсатқан компания. Желідегі мәліметтерге сүйенсек, серіктестік былтыр ғана ашылыпты. Видеоларына қарасаң, клиенттері кезек-кезек алғысын жаудырып жатыр. Бірақ мұның бәрі тап-таза көзбояушылық дейді бүгіншулар жүрген жұрт. Сөздерінше, басым бөлігі шетелге шыға алмай қалған. Ал шыққандары жұмыс таба алмай сенделіп, ақыры елге қайта оралыпты. Полицейлер қазір алаяқтық бабы бойынша тергеу жүргізіп жатыр. 

Салтанат Әзірбек, Алматы қалалық ПД ресми өкілі:

— Аталмыш дерек бойынша жәбірленушілердің арызы ағымдағы жылдың 22 қаңтарында Алмалы аудандық полиция басқармасына келіп түскен болатын. Қазір ҚР ҚК 190-бабы 3-тармағы бойынша қылмыстық іс қозғалып, барлық мән-жайы анықталуда. Қылмыстық іс жүргізу кодексімен көзделген барлық тергеу жүргізілуде.

«Алдандық» деген жұрттың талабы бір – тездетіп ақшасын қайтару. Егер іс бұрмаланып, компаниядағылар жазадан сытылып кетсе, Жоғарғы сотқа дейін баруға бекініп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!