Өйткені олардың бау-бақша бірлестігіне салынған баспаналары нарық құнынан тым арзанға бағаланып жатқан көрінеді. Сондықтан жұрт сүрілмей тұрып елдімекен статусын беруді талап етуде.

Шаһардың жаңа әзірленген бас жоспарына сәйкес, Шығыс пен Бобровка кенті көркейтіледі. Саяжайлардың орнына қаланың сыртымен өтетін жол түсіп, зәулім үйлер бой көтереді. Алайда саяжайға үй салып, қысы-жазы сонда тұратындар жалғыз баспанамызды бұзғызбаймыз деп наразы.

Ұлардай шулаған қараша атқамінерлер қара халықпен санаспады деп ашулы. Тіпті маңдай терімен салынған үйлерінінің тым арзанға бағаланатынын да айтып отыр.

Астанадан келген мамандар саяжай жұртын сабырға шақырып, жаңа бас жоспармен таныстырып әлек. Олардың айтуынша, 2040 жылға дейін көне қала көркейеді.

Гүлден Ортай, «Астана бас жоспары» ғылыми-зерттеу жоба институтының маманы:

— Семей қаласының 2040 жылға дейін бас жоспары әзірленді. Қазір халықпен қоғам талқылауы өтіп жатыр. Саяжайлар бойынша ең үлкен өзгерістер Бобровка, Восточный сол және оң жақ саяжайлар да болады. Саяжайлардың барлығы сүріледі. Орнына бес және 9 қабаты тұрғын үйлер салынады.

Әкім-қаралар қыркүйек айында саяжайларды заңдастыруды тоқтатып тастаған. Енді жұрттың жаппай наразылығынан кейін, салынған баспаналарға құжат жасауға қайта рұқсат беріп отыр. Алайда шенеуніктер саяжайға елдімекен статусын беру «талапқа сай келмейді» дейді.

Нұрбол Нұрсағатов, Семей қаласының әкімі:

— Заң бойынша, егер елдімекен қылсақ, үйлерді бірінің жанына бірін салып тастағансыздар. Ал норма бойынша жол шашамен алты метр емес, 15 метр болу керек. Қазір біз ондай етсек, ортадағы үйлер сүріледі.

Кеңес дәуірінен қалған Бобровка, Мирный, Мұрат және Шығыс кентіне қарасты саяжайларға жұрт қоныстанып алған. Тұрғындардың жүргізген есебі бойынша, шамамен саяжайларда 30 мыңға жуық адам тұрып жатыр. Тіпті бау-бақша бірлестіктеріне білім ошақтары мен мешіттер де салынған. Ал баспаналардың сүрілу-сүрілмеуі әлі де басы ашық күйінде қалып тұр. Өйткені қаланың бас жоспар әлі толық бекітілмеген.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!