Темір ауданына қарасты Шұбарқұдық кентінің тұрғындары бір сәтте көше бойына лап қойған судан аңтарылып қалды. Елдімекенге таяу Мұқантауы қырындағы қар еріп, сол Шұбарқұдық кентіне жайылған. Отыз үйдің ауласын су басып, бес үйдің ішіне кірген. Тұрғындары көшірілді. Құтқарушылар қауіп әлі сейілген жоқ деп отыр. Көмекке көрші Маңғыстаудан төтенше жағдай департаментінің жасағы келмекші. Одан бөлек, Ақтөбедегі әскери бөлімнің қызметкерлері де осында келген.

Саид Молдақараев, Ақтөбе облысы ТЖД бастығының орынбасары:

— Маңғыстау облысынан 52 адам, бес техника қазіргі таңда осы көмекке келе жатыр. Олар келген уақытта сол Темір ауданында Шұбарқұдықта жұмыс атқаратын болады. Ол жақта қазіргі су төмен түсті. Бірақ тағы да анау күн жаңбыр жаууына байланысты қауіп төне ме деп қосымша күштерді сол жаққа тартып жатырмыз.

Төтенше жағдай министрінің орынбасары да осы өңірде жүр. Ерлан Нұрпейісов таң атпай Темір ауданынан бір-ақ шықты. Қазір Байғанин, Әйтеке би мен Мұғалжар аудандарында да тасқыннан қауіп бар. Байғаниннің Қарауылкелді ауылында тоғыз үйдің ауласын су басып қалған. Ембі қаласында трассаны қазып, еріген қар суының бетін бұрды. Тасқыннан бұзылған төрт көпірді қызыл су басылғанда бірден жөндейміз дейді өңір басшысы. Бірақ тасқыннан мүлдем жол жарылмай, көпір құламау үшін қыруар ақша керек деп отыр ол.

Асхат Шахаров, Ақтөбе облысының әкімі:

— Бір апта ішінде қалпына келтіріледі деп күтілуде. Су деңгейі төмендесе, тиісті техника мен иннертті материал дайын тұр. Жаңағы айтылған төрт көпір мәселесі ауыл арасы, кіреберіс көпірлер. Көпір дегенде су өтетін өздері жасап алған көпір өткелдері. Жалпы биыл 1 млрд 100-ге 17 жоба жасалды. Қала емес өңірге. Толықтай су тасқынға байланысты барлық жобаларды іске асыратын болсақ онда 11 млрд талап ететін болады.

Облыс орталығында үйлерді су алмағанымен, қаланың шетіндегі саяжайлар көлкіп тұр. Геофизик атты бау-бақша бірлестігіндегілер қайықпен кезекшілік қойған. Трассамен үйлеріне Венециядағыдай жетеді.

Тұманбек Тәжіғұлов, Ақтөбе қаласының тұрғыны:

— Мына қайықпен көршілерге осылай өткізіп жатырмын. Әрі қарай өткізіп жіберемін. Ауламен арғы жағында екі көше. Бүткіл көршілер менің ауламмен өтеді. Мен өткізіп отырамын. Былай қарай кімде ұзын етігі бар. Сосын бір етігім бар, оны да көршілер менен алады.

Мамандар бұл өңірдегі тасқынның басы ғана дейді. Себебі, өзен деңгейі енді көтеріліп, тоң да жаңа жібіп жатыр. Оған қоса алда екі күн қатарынан жаңбыр жауады екен. Құтқарушылар осыны айтып сақтандырумен жүр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!