Қоғамды дүр сілкіндірген бұл жағдай өткен жылдың қараша айында болды. Екібастұз қаласының маңындағы Шідерті ауылының тұрғыны жедел жәрдемге қоңырау шалып, баласының тыныс алмай жатқанын және денесінің суып кеткенін хабарлаған. Оқиға орнына дереу жеткен дәрігерлер сегіз айлық нәрестенің шетінеп кеткенін анықтапты. Тергеуде әйел баласын жеті күн бойы дұрыс тамақтандырмағаны белгілі болған. Іс сотқа жетіп, сәбиіне бір апта нәр татырмаған ана бір жылға бас бостандығынан айырылды. Сотта күдікті өз кінәсін толық мойындаған.

Маржан Құрманғалиева, Павлодар облысы сотының баспасөз қызметінің бас маманы:

— Бұл қылмыс онша ауыр емес қылмыстар санатына жатады және оны жасағаны үшін заңда үш жылға дейін бас бостандығын шектеу немесе бас бостандығынан айыру түріндегі жаза көзделген. Сотталушының қылмыстық жауаптылығы мен жазасын ауырлататын мән-жайдың болмауына және жеңілдететін мән-жайлардың болуына байланысты жазаның мөлшері көрсетілген мерзімнің жартысынан, яғни 1 жыл 6 айдан аспауы керек. Сот сотталушының жеке басын және отбасылық жағдайын ескере отырып, оған бір жыл мерзімге бас бостандығынан айыру жазасын тағайындады.

Сотталушының тағы екі баласы бар. Шақалағын аштан қатырған әйел ата-ана құқығынан айырылып, қос бүлдіршінді құзырлы органдар балалар үйіне орналастырды.

Лаура Дүсіпова, Екібастұз қаласы, білім бөлімінің басшысы:

— 2019 жылы туған бала Екібастұз қаласының «Үміт» арнаулы қызметтерге мұқтаж балаларды қолдау орталығында, ал 2021 жылы туған екінші қызы Павлодар облысы мамандандырылған балалар үйіне орналастырылды.

Баласын аштан қатырған ана алдағы бір жылын темір тордың ар жағында өткізеді. Ал отбасында тәрбиеленген тағы екі қыз, бес және үш жасар қос бүлдіршіннің тағдыры алдағы бір жылда белгілі болмақ. Себебі, сотталушы заң бойынша алты ай ішінде ата-ана құқығын қалпына келтіруге мүмкіндігі бар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!